Сиинэҕэ «Булчут күрэҕэ — 2025» Улуу Кыайыы 80 сылыгар, Булчуттар күннэригэр ананан үрдүк таһымнаахтык ааста. Күн-дьыл туран биэрэн күрэх кыттааччыларын үөртэ. Булчут уолаттарбыт бары көхтөөхтүк кыттан бэйэлэрэ да астыннылар, көрөөччүлэри да сэргэхситтилэр.
Бу күрэҕи салайан, сүүрэн-көтөн тэрийээччинэн нэһилиэктээҕи Булчуттар уонна балыксыттар уопсастыбаларын бэрэссэдээтэлинэн быйыл талыллан үлэлиир Николай Турахов буолар.
Сэттэ түһүмэхтээх күрэххэ барыта биэс хамаанда кытынна. Ол курдук, булчуттар пейнтболга, эстафетаҕа, булт албаһыгар кыахтарын, сатабылларын көрдөрдүлэр. Ону ааһан олус тыҥааһыннаах түһүмэхтэргэ — Буранынан куоталаһыыга, УАЗ массыынаны соһууга күүстэрин-уохтарын көрдөрөн илин-кэлин түһүстүлэр.
Уопсай түмүгүнэн бастакы миэстэ «01» хамаанда буолла уонна хамаанда хас биирдии кыттааччыта 10 тыһ. солкуобай уу харчынан бириэмийэлэннэ. Кыайыылаах хамаандаҕа Яковлевтар дьиэ кэргэн спонсордаатылар. Иккис миэстэ «Сафари» хамаанда таҕыста,
«Охотник» маҕаһыынтан манок бириис тутта. Үһүс миэстэҕэ «Гараж» ОДьХХ хамаандата тигистэ, уолаттар утуйар мөһөөччүк бэлэх ыллылар.
Быйылгы күрэххэ элбэх спонсор көмөтүнэн бу курдук араас сыаналаах бириистэр туттарылыннылар. Бэлиэтээн эттэххэ, олохтоох «ИЗОстудия» (салайааччы Александрова М.И.) уруһуйдьуттара айан таһаарбыт булка-алка сыһыаннаах хартыыналара көрөөччүлэр биһирэбиллэрин ылыан ыллылар. Күрэхтэһии киэҥ оһуокайынан түмүктэннэ.
Ульяна Степанова, Сиинэ с.