Россияҕа Дьиэ кэргэн сылыгар Родион Алексеевич Христофоров дьиэ кэргэнин туһунан билиһиннэриэхпин баҕарабын.
Родион Алексеевич Тумул нэһилиэгэр Орто Кытыл начаалынай оскуолатыгар 1934-1962 сыллар тухары учууталынан, сэбиэдиссэйинэн үлэлээбит. Кэргэнинээн Евдокия Владимировналыын уон үстэ оҕоломмуттарыттан биэһэ тыыннаах хаалар. Оҕолорун барыларын үөрэттэрэн эбээ-эһээ буолан олорбуттара. Билигин кинилэр кыыстара Елизавета Родионовна Копырина Дьокуускай куоракка олорор. Кини ССРС доруобуйатын харыстабылын туйгуна, доруобуйа харыстабылын бочуоттаах бэтэрээнэ, «За доблестный труд в ознаменование 100-летия со дня рождения В.И.Ленина» мэтээл хаһаайына. Кэргэнэ Роман Романович Копырин Норуот үөрэҕириитин туйгуна, РФ үрдүк профессиональнай үөрэхтээһин бочуоттаах үлэһитэ.
Елизавета Родионовна аҕатын аатын үйэтитэргэ оҕолорун, сиэннэрин, хос сиэннэрин кытта элбэх үлэни ыыталлар. Ол курдук 2011 сылтан Тумул оскуолатын бүтэрэр оҕолорго анал стипендия туттараллар, 2013 сылтан учууталларга анаан улуустааҕы «Христофоровские чтения» научнай-практическай конференция ыыталлар. 2023 сылга аҕаларын, эһээлэрин үлэлээбит оскуолатыгар мемориальнай дуоска оҥорторон ыйаабыттара. Ааспыт сыл сэтинньитигэр Р.А. Христофоров аата Тумул сүрүн уопсай үөрэхтээһин оскуолатыгар иҥэриллибитэ. Быйыл улууска үөрэхтээһин 150 сылыгар оскуолаҕа дьиэ кэргэнинэн үлэлиир Гаврильевтар дьиэ кэргэҥҥэ Христофоровтар сыдьааннара анал стипендия туттарбыттара. Билии күнүгэр аҕаларын, эһээлэрин Родион Христофоров мэтириэтин үөрүүлээх быһыыга-майгыга оскуолаҕа бэлэхтээбиттэрэ. Ону сэргэ, 9 кылаас үөрэнээччилэригэр «Удивительная и загадочная Якутия. Энциклопедия об истории, культуре, природе и тайнах самого холодного края» кинигэ уонна оскуолаҕа харчы туттарбыттара.
Быйыл биһиги Тиит Арыы орто оскуолатын бүтэрбиппит 50 сылыгар Родион Алексеевич Христофоров сиэнэ, СӨ үөрэхтээһин туйгуна, Софья Сидорова аатынан бириэмийэ лауреата, Тиит Арыы нэһилиэгин бочуоттаах олохтооҕо Маргарита Кузьмина үс киһиэхэ — Альбина Максимоваҕа, Людмила Санниковаҕа уонна миэхэ бэлэх туттаран долгуппута.
Родион Алексеевич Христофоров нэһилиэгин дьонугар дириҥник ытыктанара. Дэлэҕэ, дьоно-сэргэтэ уол оҕолорун Родион диэн ааттыахтара да. Елизавета Копырина бииргэ төрөөбүт дьонун оҕолорун, сиэннэрин, хос сиэннэрин кытта төрөөбүт дойдулара Тумул нэһилиэгэ сайдарыгар ис сүрэхтэриттэн баҕараллар.
Ытыктыыр дьоммутугар кытаанах доруобуйаны, дьоллоох олоҕу баҕарабыт.
Лидия Христофорова, Тумул с.