Аҕам саастаах дьон күнүн Тиит Арыы уонна Тумул нэһилиэгин дьоно сэргэхтик атаардыбыт.
Тиит Арыы нэһилиэгин бэтэрээннэрэ (салайааччы Елена Наумова) Тумулга кэлэн Н.Г. Соломонов аатын сүгэр түмэлгэ сырыттылар. «Палитра» куруһуокка дьарыктанар уруһуйдьуттар үлэлэрин көрөн астыннылар. Ол кэннэ Тумул култуура уонна спорт киинигэр Тумул бэтэрээннэрин (салайааччы Дария Максимова) кытта көрсөн ирэ-хоро кэпсэтэн, ыллаан-туойан бириэмэбит биллибэккэ ааста.
Бу күн аан дойдуга Музыка күнэ бэлиэтэнэр, онон ыалдьыттарбыт ырыа кэһиилээх кэлбиттэрэ үөртэ. Ырыаны олус сөбүлээн ыллыыллара өтө көстөр (салайааччы Екатерина Ефремова). Валентина Шадрина эдэр сааһыгар Тумул кулуубугар үлэлээбитин ахтан туран үҥкүү бэлэхтээтэ.
Бу тэрээһини тэрийбит М.Д.Федоров-Ырыа Миисэ аатынан»Эркээйи» култуура киинин үлэһиттэригэр (дириэктэр Александра Ноговицына) уонна Тумул Култуура уонна спорт киинин үлэһиттэригэр (дириэктэр Сандра Матвеева) улахан махталбытын тиэрдэбит. Үлэҕитигэр үрдүк ситиһиини, тус олоххутугар дьолу, кытаанах доруобуйаны баҕарабыт.
Лидия Христофорова, Тумул с.