#Эркээни ыһыаҕа-2024
Эркээни ыһыаҕар «Тапталлаах биһигим оскуолам» Хаҥалас улууһугар үөрэҕирии төрүттэммитэ 150 сылыгар анаммыт уруһуйга уонна хартыынаҕа күрэх-быыстапка тэрилиннэ.
Манна Тумул нэһилиэгиттэн «Палитра» куруһуок иһинэн дьарыктанар уруһуйдьуттар быйыл эмиэ кытыннылар. Барыта аҕыс үлэ быыстапкаҕа турда. Биһиги уруһуйдьуттарбыт үлэлэрэ номинацияҕа тиксибиттэриттэн олус үөрдүбүт. Ол курдук Христина Герасимова үлэтэ мэтириэт жанрыгар бастыҥ буолла, Алена Пахомова теманы дириҥник арыйбытынан, Кристина Лукина айымньы тематикатыгар сөп түбэһэр үлэлээҕинэн анал ааттарга тигистилэр. Өссө «Палитра» түмсүү «Бастыҥ айар түмсүү» номинация ылан үөрүүбүт үрдээтэ.
Түмсүүбүт 2011 сыллаахха тэриллибитэ. Бастакы салайааччыбытынан бибилэтиэкэр Клавдия Родионова этэ. Кини көҕүлээһининэн уруһуйдуон баҕалаах дьону түмэн, биир дойдулаахпыт Галина Семенованы ыҥыран маастар-кылаас ыыттарбыта. Билигин «Палитра» куруһуок үлэтин бибилэтиэкэр Ангелина Семенова тэрийэр. Үлэлэрбит сылын аайы улуус ыһыаҕар ыытыллар быыстапкаларга кыттан ситиһиилэнэлэриттэн олус үөрэбит. Уһуйааччыбыт Галина Дмитриевна дойдутун дьонун дьарыктыырын куруук долгуйа күүтэбит,
киниэхэ махталбыт улахан. Учууталбытыгар дьолу, үлэтигэр үрдүк ситиһиини, доруобуйаны баҕарабыт!
Лидия Христофорова, Тумул с.