Устудьуон олоҕо
Покровскайдааҕы “Айтыын” цифровой технология коллеһыгар (дириэктэр Сергей Сысолятин) сүрүн үөрэҕи таһынан араас тэрээһиннэр быыстала суох бараллар. Маны сүрүннүүр киһинэн дириэктэри иитэр үлэҕэ солбуйааччы Мария Моисеева буолар. Холобура, Анал байыаннай дьайыыга сылдьааччыларга көмө манна быыстала суох ыытыллар. Мин сылдьарбар устудьуоннар преподавателларын кытта блиндажнай чүмэчи кута сылдьаллара уонна Аҕа дойдуну көмүскээччилэр күннэригэр аналлаах «Квиз-оонньууга» кытыннылар.
Колледж биир көхтөөх устудьуона Бүлүү Хампатыттан сылдьар, 2-с кууруска туйгуннук үөрэнэр Анатолий Еремеев буолар.
— Бүлүү улууһун Хампа орто оскуолатын үөрэнэн бүтэрэн баран тастыҥ убайым холобурун батыһан Хаҥалас улууһун киинигэр Покровскайга кэлбитим, «Айтыыҥҥа” үөрэнэбин. Ийэм Наталья Васильевна оскуола интэринээтигэр асчыт, аҕам Иннокентий Семенович «Туймаада-нефть» АЗС сапыраапкатыгар үлэлиир. Бииргэ төрөөбүттэр бэһиэбит, икки уол уонна үс кыыс, мин иккис оҕобун, — диир Толя.
Туйгун устудьуон, «Информационнай ситимнэр бырагыраамаларын оҥоруу» диэн идэҕэ үөрэнэр. Куратора Сардана Юрьевна Ефимова үөрэҕэр уонна иллэҥ кэмин атаарарыгар араас тэрээһиннэргэ кыттарыгар сүрүннэһэр. Толя чөл олоҕу батыһан, чэгиэн буолар туһуттан спортсаалаҕа этин-сиинин эрчийэр, тхэквондонан дьарыктанар. Ону таһынан, билигин «Сомоҕол» улуустааҕы ыччат бэстибээлигэр бэлэмнэнэн патриотическай тыыннаах үҥкүүгэ бэлэмнэнэ сылдьар. Оскуолаҕа үөрэнэр кэмигэркини сэттэ сыл устата оскуола тыйаатырыгар дьарыктаммыт. Москва, Санкт-Петербург, Сочи куораттарга сылдьан «Ай-куо түүлэ» уонна «Кустук» сценкалары көрдөрбүттэрин уол олус истиҥник ахтар.
Устудьуоннар олоххо көхтөөх дьон, үтүө дьыала тэрээһиннэригэр үгүстүк кытталлар. Толя доҕотторунаан хаар ыраастааһыныгар, муус ылыытыгар сылдьыбытын, аҕам саастаахтарга куруук көмө буолалларын киэн тутта кэпсээтэ.
Уйбаан УЙГУУРАП,
Хаартыскаҕа: II куурус туйгун устудьуона Толя Еремеев.
Аҕа дойдуну көмүскээччилэр күннэригэр аналлаах «Квиз-оонньуу».