А.В.Дмитриев аатынан Ой орто оскуолатыгар үөрэх дьылын бастакы күнүгэр үөрүүлээх линейка кэнниттэн «Эллэйээдэ» үөрэнээччилэр научнай экспедицияларын төрүттээччи академик Никита Соломонов учуонайдары кытары лекциялардаах ыалдьыттыыр буолара.
— Быйыл, ытык киһибит Никита Гавриилович төһө да олохтон бардар, үтүө үгэс салҕанна. Бу күн оскуолабытыгар биллиилээх палеонтологтар, Воронежтан Киин Сибиир түмэлин штаты таһынан сотруднига Роман Калибин уонна Россия Наукаларын Академиятын Красноярскайдааҕы киинин лабораториятын научнай сотруднига биолог Яков Колесников ыалдьыттаатылар. Экспедициябыт сайыҥҥы үлэтин барыллаан түмүгүн билиһиннэрии кэнниттэндьоммут олус кэрэхсэбиллээх лекциялары аахтылар, — кэпсиир «Эллэйээдэ» экспедиция научнай салайааччыта Прокопий Ноговицын. — Таарыччы эттэххэ, атырдьах ыйын бүтүүтэ бу учуонайдар оҕолорбутун кытары хас да күн экспедицияҕа сырыттылар, ол иһигэр Эркээни хочотугар, Табаҕа тумуһугар, Өлүөнэ Очуостарын аттыгар уоннаүөрэх дьыла арыллыыта оскуолабытыгар лекциялардаах кэлэн үөртүлэр. Биһиги сайыҥҥы булумньуларбытынан быыстапка тэрийдибит.
Яков Валерьевич динозаврдар тустарынан олус интэриэһинэйи кэпсээтэ, ордук Саха сиригэр үөскүү сылдьыбыттар, муоратааҕы ящурдар тустарынан. Кини биһиэхэ уонна ханна да суох палеонтологическай булумньуларыттан бэлэхтээх буолла, кэллиэксийэбитин хаҥатта. Онтон Роман Викторович брахиоподтарга презентациялаах кэллэ, ол иһигэр Өлүөнэ өрүспүт орто сүнньүттэн көстүбүт түҥ былыргы харамайдар тустарынан кэпсиир. Биһиэхэ араас геологическай кэрчик кэмнэртэн брахиоподтарыттан бэлэх уунна. Бу оҕолору кытары хаһыс да сылларын сайын аайы дьарыктанар учуонай-доҕотторбут билиибитин хаҥаталлар, саҥа саҕалаан эрэр чинчийээччилэргэ наукаҕа сыстарга тирэх буолаллар. Астынабыт, өйөбүллэрин иһин махтанабыт!
Киэн туттар биир дойдулаахпыт Никита Соломонов олохтообут үтүө үгэһэ атын да оскуолаларга батыһааччылардаах буоллун.
Людмила Мордовская.