Бары бииргэ
«Илии сылааһа» өрөспүүбүлүкэтээҕи иис сыаҕын «Эркээни иис» Покровскайдааҕы филиалын салайааччыта Альбина Лукина өрөспүүбүлүкэ иистэнньэҥнэрин састаабыгар киирсэн Москваҕа «Бэс чагда» санаторийга эмтэнэн кэллэ. Волонтердар бу сынньанар-эмтэнэр да сырыыларыгар көмөлөрүн тохтоппокко, байыастарга таҥас-сап илдьэн, госпиталларга эмтэнэ сытар биир дойдулаах уолаттарын көрүстүлэр.
— Мантан Москваҕа барарбытыгар уон устуука «Эр хоһуун» кэмпилиэкпитин илдьэ барбыппыт. Бу таҥастарбытын Н.Н. Бурденко аат. Кылаабынай байыаннай клиническай госпиталга Саха сириттэн анал байыаннай дьайыыга кытта сылдьан бааһыран кэлэн эмтэнэр уолаттарбытыгар биэрдибит. Манна бэйэм таҥыннаран ыыппыт уолбун, Нөмүгү ыччатын уонна Покровскайга олоро сылдыбыт Булуҥ уолун көрсөн, дуоһуйа дойдубут сонунун ирэ-хоро кэпсэтэн аастыбыт, — диэн Альбина Петровна айантан сонунун үллэһиннэ.
— Биһиги «Бэс чагдаҕа“ мээнэ сыппатыбыт, киэһэ аайы түмсэн байыастар бары олус наадыйар харыстанар сиэккэлэрин өрөн бэлэмнээтибит. Онон сынньалаҥы, көмөнү дьүөрэлээн сырыттыбыт. Дойдубар кэлээт да эмиэ үлэбитигэр умса түстүбүт. Инники кирбиигэ сылдьар уолаттар көрдөһүүлэринэн бу күннэргэ халыҥ, чараас кэмпилиэктэри, футболка, стеганай куртка уо.д. а. таҥастары тигэн Дьокуускайга ыыттыбыт. Покровскай куорат урбаанньыта Василий Федоров көмөтүнэн биһиги тикпит таҥастарбытыгар анаан лейбл оҥортордум. Онон саҥа таҥастарбыт филиалбыт аата ыйыллар туспа бэлиэлэннилэр, — диэн кылгастык кэпсээтэ волонтер Альбина.
Санатан эттэххэ, «Илии сылааһа» иис сыаҕын волонтердара дойдубут киинигэр баар санаторийга өрөспүүбүлүкэ салалтатын өйөбүлүнэн чэбдигирдиини ааһаллар. Кулун тутарга иккис бөлөххө “Эркээни иистэн” Зоя Семенова эмиэ хапсан Москваҕа сынньана-эмтэнэ барсыахтаах.
Ольга Гермогенова