Төхтүргэ Хаҥалас улууһун уонна Төхтүр нэһилиэгин Бочуоттаах олохтооҕо Александр Ильич Борисов сырдык аатыгар анаан улуустааҕы Ыччат салаата, Төхтүр нэһилиэгин дьаһалтата, «Эркээни» КСК, Айылҕа харыстабылын инспекцията булка-балыкка сыһыаннаах күрэҕи тэрийэн ыыттылар.
Билэрбит курдук, Александр Борисов, саха киһитин сиэринэн, сис тыалары кэрийэн бултуурун-алтыырын, балыктыырын, үрүйэлэри-үрэхтэри туораан күндү түүлээҕи эккирэтэрин, дурдаҕа кирийэ сытан кус маныырын туохтааҕар до ордороро, Күөх Боллоххо, Байанайга сүгүрүйэрэ.
Буолан ааспыт күрэххэ Хаҥалас улууһугар олорор, үлэлиир, үөрэнэр 18-тан — 35-гэр диэри саастаах ыччаттар кыттыннылар. Уопсайа 5 хамаанда, 30 кыттааччы Покровскай куораттан, Төхтүр, Нөмүгү нэһилиэктэриттэн уонна Өктөмнөөҕү АСАТУ филиалыттан кэлэн күрэхтэстилэр.
Хамаандалар алта киһилээх састаабынан 6 түһүмэххэ күөн көрүстүлэр. Манна уолаттар булка төһө сыһыаннаахтарын көрдөрдүлэр. Хас да чаастаах, тыҥааһыннаах киирсии кэнниттэн кыайыылаахтар биллэннэр сыаналаах бириистэринэн наҕараадаланнылар. Ол курдук, I-кы миэстэҕэ Покровскай куораттан полиция уонна Спорт Дыбарыаһын үлэһиттэрин сүүмэрдэммит хамаандата тахсан Александр Борисов дьиэ кэргэнэ туруорбут бирииһин ылар чиэстэннэ. II-с миэстэҕэ Төхтүр уонна III-с миэстэҕэ Нөмүгү нэһилиэктэрин хамаандалара таҕыстылар.
Маны таһынан анал ааттар иҥэриннилэр — «Бастыҥ кутаа уотун умаппыт» Покровскай куораттан Александр Мушников уонна Руслан Новгородов буоллулар, «Бэргэн ытааччы» ааты эмиэ Покровскайтан Денис Охлопков ылла, «Бастыҥ маамыктаһыт» Төхтүр хоһуун ыччата Дьулустан Кугданов буолла, «Бастыҥ ойбон алларааччы» Нөмүгү уолана Сарыал Сивцев, «Кэскиллээх кыттааччы» Геннадий Соломонов АСАТУ Өктөмнөөҕү филиалын устудьуона буоллулар.
Тэрийээччилэр ааттарыттан олохтоох «Евгения», «Эргиэн», «Сайдам» маҕаһыыннар хаһаайыннарыгар бирииһинэн көмөлөспүттэрин иһин барҕа махталбытын тириэрдэбит.
Татьяна Владимирова.