Сэтинньи 1-3 күннэригэр Дьокуускай куорат “Триумф” спорт комплексыгар РФ спордун маастара, Ил Түмэн депутатынан үлэлии сылдьыбыт, саха тустуутугар улахан өҥөлөөх Александр Крылов кэриэһигэр көҥүл тустууга Бүтүн Россиятааҕы турнир үһүс сылын ыытылынна.
Турниры Александр Владимирович доҕотторо уонна төрөөбүт Өймөкөөнүн улууһа тэрийэн ыыттылар. Быйылгы турнирга 18 хамаандаттан барыта 155 бөҕөс кытынна. Түһүлгэҕэ Амурскай, Иркутскай, Новосибирскай, Московскай уобаластар, Забайкальскай, Приморскай кыраайдар, Кабардино-Балкария, Кемерово, Красноярскай, Москва, Оренбург, Бурятия, Хотугу Осетия, Тыва, Хабаровскай, Монголия уонна Таджикистан бөҕөстөрө күөн көрүстүлэр. Кинилэр ортолоругар Россия спордун норуоттар икки ардыларынааҕы кылаастаах 6 маастара, Россия спордун 37 маастара кытынна.
Бүтүн Россия турнирын чемпионнарынан буоллулар:
57 киилэҕэ (34 бөҕөс кытынна) Аяндай Ондар (Тыва),
61 к (30) Кежик Монгуш (Иркутскай),
65 к (16) Кежик Чымба (Красноярскай),
70 к (19) Айсен Потапов (Саха),
74 к (14) Константин Капыров (Саха),
79 к (8) Никита Сучков (Красноярскай),
86 к (12),Дмитрий Зайнидинов (Красноярскай),
92 к (9) Буянто Шадапов (Бурятия),
97 к (7) Константин Пшеничников (Кемерово),
125 к (6) Харысхан Баппагай (РСО-Алания).
Уон ыйааһыҥҥа киирсибит кыайыылаахтарга 70 тыһ. солк. көрүллүбүт, үрүҥ көмүстэргэ 50 тыһ. солк., боруонсаларга 30 тыһ. солк. туттардылар. Маны сэргэ кыайыылаах бөҕөс тренеригэр сүрүн бириис 20 тыһ солк.
Кыһыл көмүс мэтээллээхтэр ортолоругар тэрийээччилэртэн 1 мөл. солк. бириис оонньонно. Сүрүн бирииһи Саха сирин спортсмена Айсен Потапов (Дьааҥы улууһа) ылла.
Күрэх кылаабынай судьуйатынан норуоттар икки ардыларынааҕы категориялаах судьуйа Солтан Засеев (Пермь), кылаабынай сэкиритээринэн Бүтүн Россиятааҕы категориялаах судьуйа Василий Уйгуров (Дьокуускай) үлэлээтилэр.
97 киилэҕэ биһиги биир дойдулаахпыт, Россия спордун маастара Даниил Иванов ыйааһыныгар 7 бөҕөс туһунна. Уолбут үрүҥ көмүс мэтээли ылла, Тимур Котаев (Красноярскай) боруонса мэтээлинэн наҕараадаланна. Даниил спортка өссө биир дьоһуннаах ситиһиитэ, көҥүл тустууга дьаныһан туран туһунна. Уолаттарга Саха сирин сүүмэрдэммит хамаандатыгар киирэ сылдьыбыта, сбордарга дьарыктанан, элбэх куоталаһыыларга сылдьан тустар маастарыстыбата үрдүүр. Улахан дьоҥҥо Өрөспүүбүлүкэ турнирыгар эмиэ бастаталыыр, миэстэлэһэр, көрөөччүлэригэр үчүгэй өйдөбүлү хаалларар. Даниил оҕо эрдэҕиттэн бырахсыылаах бөҕөс, кимтэн да саллыбат, иҥнэн-толлон турбат тустуук. Кини сааһа 22 эрэ, онон көҥүл тустууга күөгэйэр күнүгэр сылдьар. Сүрүн тренердэрэ Петров В. Н., Багаев С.В. буолаллар. Билигин хапсаҕайга күүскэ дьарыктаныа, сайын буолуохтаах Манчаары бирииһигэр путевка ыллаҕына уолбут тустарын көрүөхпүт.
Василий МОЖУКОВ, СӨ спордун бэтэрээнэ.