Покровскайга эмчит идэлээх Александра Семеновна Васильева сырдык кэриэһигэр волейболга дьахталлар хамаандаларын икки ардыларыгар турнир саҕаланна.
Манна 45 үөһэ саастаахтарга 10 хамаанда, 35-тэн — 10 хамаанда баар. Күрэхтэһээччилэр ортолоругар Орто Халыма, Уус Алдан, Мэҥэ Хаҥалас, Хаҥалас уонна Дьокуускай куорат спортивнай кулууптарын волейболистара бааллар.
Күрэхтэһии икки сиринэн — Леонид Спиридонов аатынан спортсаалаҕа уонна Спорт дыбарыаһыгар тэрээһиннээхтик ыытылла турар.
Александра Семеновна үс сыллааҕыта суол быһылааныгар түбэһэн олохтон суох буолбута. Манна кини тэрийбит «Медик» хамаандата оонньуу сылдьар.
Күрэхтэһиини тэрийиигэ Хаҥалас улууһун Киин балыыһатын кэлэктиибэ, Доруобуйа харыстабылын идэлээх сойуустарын өрөспүүбүлүкэтээҕи кэмитиэтэ, урбаанньыттар Сергей Черняк, Валентин Латышев, «Товары все для дома» атыы-эргиэн дьиэтэ күүс-көмө буоллулар.
Итини сэргэ оскуолаҕа бииргэ үөрэммит оҕолоро, чугас дьүөгэлэрэ көмөлөстүлэр.
Александра Семеновна спорду, чуолаан, волейболу олус сөбүлүүрэ, дьону-сэргэни чөл олоххо куруук көҕүлүүрэ. Кини сырдык аата сыдьаайа турдун!
Уйбаан Уйгуурап.