Алексей Никифоров хапсаҕайга Саха сирин спордун маастара, көҥүл тустууга маастарга кандидат, Саха сиригэр бойобуой самбо, ушу саньда уонна грепплинг хас да төгүллээх кыайыылааҕа, Уһук Илиҥҥи федеральнай уокурук бойобуой охсуһуу күрэҕин призера (ММА). 2015 сыл от ыйын 16 күнүгэр Алексей ууга түспүт оҕону быыһаабыта, бэйэтэ быыһамматаҕа…
Алексей 1991 сыллаахха тохсунньу 18 күнүгэр төрөөбүтэ, Кэбээйи улууһугар Мастаах нэһилиэгэр улааппыта. 2008 сыллаахха Дьокуускай куорат 2-с №-дээх оскуолатын ситиһиилээхтик үөрэнэн бүтэрбитэ. Нөмүгүгэ Хаҥаластааҕы Оҕо спортивнай оскуолатын филиалын, Дьокуускай куорат 3-с №-дээх оҕо спортивнай оскуолатын иитиллээччитэ этэ. 2008 сыллаахха Дьокуускайдааҕы милиция үрдүкү оскуолатыгар туттарсан киирбитэ, М. К. Аммосов аатынан ХИФУ юрист идэтигэр көспүтэ. 2011-2012 сс. аармыйаҕа сулууспалаан младшай сержант аатын ылбыта. 2014 сыллаахха хапсаҕайга Саха сирин спордун маастарын толорбута. 2015 сыллаахха юрист идэтин баһылаабыта.
Спортка бүтэһик ситиһиилэрэ:
2013 сыл
- Хапсаҕайга Попов аатынан өрөспүүбүлүкэ күрэҕин призера
- Хапсаҕайга Коркин аатынан өрөспүүбүлүкэ күрэҕин кыайыылааҕа
- Самбоҕа Степанов аатынан өрөспүүбүлүкэ күрэҕин призера
- Хапсаҕайга Халдеев бирииһигэр ыытыллыбыт өрөспүүбүлүкэ күрэҕин призера
- Любительскай самбоҕа өрөспүүбүлүкэ күрэҕин призера.
2014 сыл
- Хапсаҕайга Давыдов аатынан өрөспүүбүлүкэ күрэҕин призера
- Хапсаҕайга Ноговицыннар бириистэригэр өрөспүүбүлүкэ күрэҕин призера
- Ушу көрүҥүгэр Брюс Ли аатынан өрөспүүбүлүкэ күрэҕин призера
- Хаҥалас Хапсаҕайын кыайыылааҕа
- АДСС эгидатын аннынан грэпплиҥҥэ иккис өрөспүүбүлүкэтээҕи күрэх кыайыылааҕа.
2015 сыл
- Өрөспүүбүлүкэтээҕи бойубуой охсуһуу күрэҕин призера (ММА)
- Боевой самбоҕа өрөспүүбүлүкэтээҕи аһаҕас күрэх призера
- Хаҥалас хапсаҕайын призера
- Уһук Илин федеральнай уокурукка бойобуой охсуһууга күрэҕин (ММА) призера.
Алексей Никифоров кэриэһигэр хапсаҕайга өрөспүүбүлүкэтээҕи турнир соторутааҕыта Дьокуускай куорат “Модун” споркомплексыгар ыытылынна. Спортсменнар алта ыйааһыҥҥа кииристилэр. Кыайыылаахтарга 15 тыһ. солкуобай, үрүҥ көмүс мэтээлгэ тиксибиттэргэ 10 тыһ. солкуобай уонна боруонсаны ылбыттарга 7 тыһ. солкуобай туттардылар. Муҥутуур кыайыылааҕы быһаарыыга икки киирсии олохтоммут, 75 киилэҕэ диэри уонна үөһэ ыйааһыҥҥа сүрүн бириис 50 тыһ. солкуобай.
Бу күрэххэ 25 улуустан 254 бөҕөс кэлэн кытынна. Хамаанда уопсай көрдөрүүтэ:
I миэстэ – Үөһээ Бүлүү (31 очукуо)
II миэстэ – Чурапчы (36 очукуо)
III миэстэ –Кэбээйи (41 очукуо)
IV миэстэ – Уус Алдан (41 очукуо). Биһиги улууспут бөҕөстөрө 62 очукуоланан сэттис миэстэҕэ тигистилэр.
Бастакы турнир чемпионнарынан буолаллар: 57 киилэҕэ – Михаил Осипов (Ньурба), 65 киилэҕэ – Родион Васильев (Хаҥалас), 75 киилэҕэ – Игорь Матвеев (Нам), 85 киилэҕэ – Айтал Громов (Өймөкөөн), 95 киилэҕэ – Андриан Ленскай (Чурапчы), 95 киилэттэн үөһэ – Даниил Иванов (Хаҥалас).
Аар Дархан аатын Сергей Николаев (Кэбээйи, 75 киилэҕэ дылы), Андриан Ленскай (Чурапчы, 75 киилэттэн үөһээ) ыллылар. Күрэх кылаабынай судьуйатынан Данилов В. И., кылаабынай сэкирэтээринэн Захаров А. А. үлэлээтилэр.
Саха сирин элбэх улуустарыттан эдэр хапсаҕайдьыттар кэлэн сытыы хапсыһыыларга буcтулар-хаттылар, тустуук быһыытынан кинилэр үүнэллэр-сайдаллар. Чугас доҕотторо Алексейы умнубаттар.
Василий МОЖУКОВ, СӨ спордун бэтэрээнэ,
Покровскай к.