Маннык ааттаах истиҥ көрсүһүүнү үйэ аҥара буолан баран 1-Дьөппөн оскуолатын 1973 сыллаахха бүтэрбиттэр үөрэхпит кыһатыгар тэрийдибит, Учуутал аллеятын арыйдыбыт.
Биһиги, Хоточчу, икки Дьөппөн оҕолоро, бэрт эйэлээхтик алтыһан үөрэммиппит, оскуолабытын 47 буолан бүтэрбиппит. Оҕо сааспыт сыллара умнуллубаттар. Ордук кылааспыт салайааччыларынан оччотооҕуга Саха сиригэр Герцен аатынан пединституту саҥа бүтэрэн кэлбит нуучча тылын уонна литературатын учуутала Анна Васильевна Беспалова, математиканы үөрэппит Любовь Алексеевна Богданова үлэлээбиттэрэ. Педагогтарбыт өрүү бииргэ сылдьаллара, соҕуруу дойдуларын туһунан кэпсииллэрэ. Онтон даҕаны буолуо үгүстэрбит киин үөрэх кыһаларыгар туттарсан киирбиттэрэ, орто да үөрэхтэргэ Ленинградка баран үөрэммиттэрэ. Анна Васильевнабыт кэлин дойдутугар Ленинградка төннүбүтэ, куруутун үөрэппит оҕолорун көрсөн, куоратын көрдөрөн, дьиэтигэр да олордон өйүүрэ. Онтон Любовь Алексеевнабыт кэргэн тахсан Дьөппөн сиригэр олохсуйбута, олохтон барыар диэри биһигини кытары билсэ олорбута. Бары учууталларбытын олус истиҥник саныыбыт.
50 сыл буолан баран көрсүһүүгэ 21 киһи муһуннубут. Оскуолабыт тиэргэнигэр аарка туруоран Учуутал аллеятын арыйдыбыт, онно учууталларбыт ааттара суруллубут ыскамыайка туруордубут. Аллея арыйбыт Туоһу сурукпутун тапталлаах учууталбыт кыыһыгар, билигин оскуолабытыгар үөрэх чааһыгар дириэктэри солбуйар Лена Петровна Ефремоваҕа туттардыбыт. Аллеяны көрсүһүүлээх выпусктар, учууталлар, оҕолор салгыы өйөөн өссө кэҥэтэн, киэркэтэн иһиэхтэрэ диэн эрэнэбит.
Үбүлүөйбүтүн көрсө ахтыы-кинигэ таһаардыбыт, оҥоһуктарбыт быыстапкатын туруордубут. Манна баара быысабай, Муся Яковлевабыт — Марфа Федотова айбыт киэргэллэрэ, мас ууһа, уруһуйдьут Владимир Александров үлэлэрэ, Альбина Черноградская сиэдэрэй ииһэ. Кэпсэтэн-ипсэтэн, ааспыты ахтыһан кэрэ да түгэннэр аастылар.
Татьяна Максимова, СӨ норуотун хаһаайыстыбатын үтүөлээх үлэһитэ, РФ геодезияҕа уонна картографияҕа туйгуна.