Өрөспүүбүлүкэҕэ 8-с төгүлүн ыытыллар «Алыптаах мааска» бэстибээл-күрэс норуот тыйаатырдарын Чурапчыга түмтэ. Бу бэстибээлгэ 17 норуот тыйаатыра кытынна (14 тыйаатыр Чурапчыга кэлэн, 3 тыйаатыр кэтэхтэн).
Бэстибээл ыытыллара норуот тыйаатырдарыгар олус туһалаах. Манна кыттан кинилэр бэйэлэрин үлэлэрин билиһиннэрэллэр, атын тыйаатырдар тугунан тыынан олороллорун көрөн саҥа санаа, сонун толкуй киирэр.
Икки күн түмүгүнэн «Бастыҥ испэктээх» аатыАллараа Бэстээхтэн “Сыккыс” норуот тыйаатыра (режиссер Мария Владимирова), “Режиссер бастыҥ үлэтэ” ааты Майаттан Ф. Ходулов аатынан норуот тыйаатыра (режиссер Данил Осипов), “Туруорааччы худуоһунньук бастыҥ үлэтэ” ааты С.П. Лугинова аатынан Амматааҕы норуот тыйаатыра (режиссер Елизавета Макарова), “Уот-күөс худуоһунньугун бастыҥ үлэтэ” ааты Абаҕатааҕы норуот тыйаатыра (режиссер Евгения Николаева), «Дорҕоон режиссерун бастыҥ үлэтэ» ааты Майатааҕы эдэр көлүөнэ тыйаатыра (режиссер Александра Скрябина) ыллылар.
Өктөмнөөҕү норуот тыйаатыра (режиссер Зоя Аржакова) «Хореограф бастыҥ үлэтэ» уонна тыйаатыр артыыската Миролюба Саморцева «Бастыҥ дьахтар оруола» икки анал ааттары ыланнар үөрүүлэрэ муҥура суох буолла. Өктөмтөн барыта 16 артыыс кытынна. Елизавета Рожина-Ил Ииһэ суруйбут «Күн көрүө, от үүнүө» диэн музыкальнай испэктээҕин ситиһиилээхтик көрдөрөн кэлбиттэриттэн олус үөрдүбүт.
Айаҥҥа күүс-көмө буолан көмөлөспүт нэһилиэк аҕа баһылыгар Александр Большаковка уонна нэһилиэк икки оскуолатын дириэктэрдэригэр Калиста Афанасьеваҕа, Юрий Шадриҥҥа дириҥ махталбытын тиэрдэбит. Тыйаатырбыт артыыстара олус көхтөөх, айымньылаах үлэҕэ ис сүрэхтэриттэн тардыһыылаах буолан, бириэмэлэрин аахсыбакка кэлэн бэлэмнэнэн, нэһилиэк икки оскуолаларыгар бу испэктээҕи көрдөрөн маннык ситиһиигэ кэллибит. Өктөмнөөҕү норуот тыйаатырын артыыстара өссө да сайда, үлэҕитин атын нэһилиэктэринэн көрдөрө, тарҕата туруҥ диэн баҕа санаабытын тиэрдэбит.
Федора Фомина, Өктөм с.