СӨ тыатын хаһаайыстыбатын министиэристибэтин ааҕар — суоттуур салаата Аммаҕа экэнэмиистэргэ уонна буҕаалтырдарга үс күннээх сэминээр тэрийэн ыытта. Хаҥалас улууһуттан «Бөртө», «Хахсыт», «Хачыкаат» «Иһит» хаһаайыстыбалартан барыта 10 буолан кыттан кэллибит.
Сэминээр киэҥ далааһыннаахтык барда. Манна кэлбит ааҕар-суоттуур идэлээхтэр туһааннаах сүбэни иһиттибит, көмө матырыйааллары ыллыбыт. Отчуокка, нолуок боппуруостарыгар, саҥа бырагыраамаларга тутаах исписэлиистэри кытта утары көрсөн олорон кэпсэттибит.
Сэминээргэ сыллааҕы отчуоту кэмигэр уонна хаачыстыбалаахтык туттарыыбыт иһин Хаҥалас улууһа 2-с истиэпэннээх дипломунан (кыл. бухҕаалтыр А.П.Матвеева), ону таһынан министиэристибэ Махтал суругун «Хахсыттан» Сайыына Горохова, «Бөртөнтөн» Татьяна Ильина министиэристибэ үрүҥ көмүс бэлиэлээх бочуотунай грамотатынан наҕараадаланнылар.
Идэ таһымын үрдэтэр сэминээри тэрийбит, ааҕар-суоттуур идэлээхтэри бииргэ түмпүт дьоммутугар чуолаан СӨ тыатын хаһаайыстыбатын миниистирин эбээһинэһин толорооччуга Петр Попов, кыл. буҕаалтырга Александра Романова, Амма улууһуттан МатренаПетроваҕа уонна министиэристибэ отчуоту түмэр салаатын тустаах үлэһиттэригэр ис сүрэхпититтэн махтанабыт. Эһиги кыһамньыгытынан «Үс Хатыҥ» сынньанар киин тиэргэнигэр олус үчүгэйдик күннэҕи түбүктэн босхолонон сынньанныбыт, Амма сылаас уутугар сөтүөлээтибит, идэбит таһымын үрдэтэр тэрээһинтэн сөптөөх туһалаах сүбэни-көмөнү ыллыбыт, салгыы үлэлииргэ күүс-уох эбиннибит. Бу курдук мэлдьи бииргэ көмөлөөх, түмсүүлээх буолуоҕуҥ.
Хаҥаластан Татьяна Петрова — Мойуу Кыыһа.