Бары бииргэ
Анал байыаннай дьайыыга сылдьар дьоммутугар, кинилэр дьиэ кэргэттэригэр өйөбүл, көмө буолуу биһиги биир сүрүн сорукпут буолар. Улууспут тэрилтэлэриттэн ойуччу тутан Олох-дьаһах хомунаалынай хаһаайыстыбатын Хаҥаластааҕы салаатын (дириэктэр Дмитрий Николаев, профком бэрэссэдээтэлэ Сергей Заровняев) бэлиэтиэхпин баҕарабын. ОДьХХ-лар бэйэлэрин үлэһиттэригэр, дьиэ кэргэттэригэр тиһигин быспакка көмөнү тэрийэллэр. Ол туһунан филиал идэлээх сойуустарын бастакы сүһүөх тэрилтэтин бэрэссэдээтэлэ Сергей Заровняев кылгастык кэпсээтэ:
— Биһиги тэрилтэбититтэн билиҥҥи туругунан 9 үлэһит анал байыаннай дьайыыга сылдьар. Нэһилиэктэргэ олорор тэрилтэбит дьонугар от-мас бэлэмнээһинигэр, муус ылыытыгар, хаар ыраастааһыныгар көмө буолабыт. Итини таһынан, дьиэ кэргэҥҥэ хомунаалынай төлөбүрдэригэр 4 тыһыынча солк. суумалаах чэпчэтии оҥоһуллар. Дьоммут уоппускаҕа кэллэхтэринэ толорооччу дириэксийэттэн, филиалтан салайааччылар тиийэн аэропортка көрсөбүт. Бу соторутааҕыта анал байыаннай дьайыы бэтэрээнэ, Булгунньахтаах учаастагын силиэсэрэ Виталий Лыткин «Нива» массыынаны дроннартан көмүскэнэр үрүттээх, куйахтаах гына уларытан оҥорон инники кирбиигэ ыыппыта. Киниэхэ бу өрөмүөн үлэтигэр үгүс киһи, салайааччыттан саҕалаан боростуой үлэһиккэ тиийэ өйөбүл тирэх буоллулар, — диэтэ Сергей Вячеславович.
Тэрилтэ үлэһиттэрэ бары бииргэ, бу курдук түмсүүлээхтик көмөлөһөн кыайыыны чугаһаталлар.
Уйбаан УЙГУУРАП,
Хаартыскалар Сергей Заровняев архыыбыттан туһанылыннылар.