Биһиги кырыы нэһилиэктэрбитигэр дьикти дьарыктаах да дьон олороллор. Олортон биирдэстэрин, таксидермист Анна Цыганкованы мин Сиинэ почта станцията 280 сыллаах үбүлүөйүн бэлиэтиир күнүгэр култуура дьиэтигэр быыскапка тэрийэ сырыттаҕына көрүстүм.
Элбэх да көтөр, кыыл чуучалатын аҕалан туруорбутун көрөн сөхтүм. Дьиҥинэн, мин уонча сыллааҕыта Анна Николаевналаахха сылдьан турабын. Оччолорго кини өссө уруһуйунан, мастан оҥоһуктарынан үлүһүйэр этэ. Бу сырыыга чуучалатын арааһа элбээбит.
— Дьиҥинэн, өссө элбэх буоллаҕа, дьааһыкка туох батарынан манна аҕаллаҕым, — үөрэ-көтө кэпсиир Анна Николаевна, Саха сиригэр дьахталлартан соҕотох чуучала оҥоруутунан дьарыктанар киһи. — Мин оҥоһуктарбын кэлин сылларгаараас түмэллэр, омук туристара кэрэхсиир буоллулар, атыылаһан илдьэ бараллар. Дьон тугу бултаабытын дьарыктанарбын билэр буолан аҕалар, дьэ ону сүлэн, ыраастаан тыыннаах олорор курдук оҥорон таһаарабын.
— Онтон каркаһын, турар тирэҕин хайдах оҥороҕун,- ыйытабын мин,- Кыылларыҥ. көтөрдөрүҥ истэригэр тугу симэҕин, урут мин Кытыл Дьураҕа учуутал-ийэм Агния Львовна Мордовская эмиэ дьарыктанар этэ, иһигэр баата, улахан кыылларга оту кытары симэр буолара, каркаһын оҥорууга аҕабыт көмөлөһөрө,- диэн ахтан аастым.
Анна Николаевна ийэм дьарыктанарын истэр этим диэтэ, онтон оҥоһуктарбар аныгы соҕус үйэ киһитэ буоларбынан паралон, искусственнай баата симээччибин, каркаһыгар уустук өттүгэр уолум көмөлөһөр, бэйэм да уһанарбын астынабын диэтэ.
Анна Цыганкова кэллиэксийэтигэр туох-туох суоҕуй — мэкчиргэ, хаас, кус, улар арааһа, тииҥ диэн, эриэҥ үөнүгэр тиийэ. Айылҕа оҕолорун дьэ бу тыыннаахтыы олорор, турар, сытар, уста сылдьар, көтөр гына оҥорон таһаарбыта эчи кэрэтин!
Людмила Мордовская.