ССРС үөрэҕириитин туйгуна, «Бочуот Знага» уордьан кавалера, Саха Өрөспүүбүлүкэтин үтүөлээх учуутала, Хаҥалас улууһун Бочуоттаах олохтооҕо Зоя Ивановна Ксенофонтова аатынан Покровскайдааҕы 2-с №-дээх орто оскуолаҕа Сахабыт сиригэр физическэй культура уонна спорт хамсааһынын 100, оскуола төрүттэммитэ 60 сылларын чэрчитинэн тэрээһин буолла.
Үөрүүлээх линейкаҕа киирии тылы оскуола дириэктэрэ, СӨ, РФ уонна ССРС спордун маастара Сергей Владимиров эттэ. Оскуолаҕа физкультура учууталынан үлэлээбит бэтэрээн учууталлар, ааттаах-суоллаах ытык дьон — Иван Михайлович Григорьев, Александр Семенович Анисимов, Николай Афанасьевич Филиппов, Мария Аммосовна Гоголева ыҥырыллан ыалдьыттаатылар уонна үөрэнээччилэргэ кылаас чаастарын ыыттылар, тус ситиһиилэрин, олохторун кэпсээтилэр.
Сырдыкка, билиигэ угуйар, сатабылга уһуйар үөрэх кыһатын салайааччыта Сергей Владимиров тэрээһин туһунан санаатын бу курдук эттэ:
— Сүрүн үөрэх бырагырааматын таһынан бу биир үйэ суолталаах хамсааһын тэрээһиннэрин чэрчитинэн элбэх күрэхтэһиилэр ыытылыннылар, спорт, үлэ бэтэрээннэрин уонна биллиилээх дьону кытта дьоһун суолталаах көрсүһүүлэр, кэпсэтиилэр буоллулар. Оскуолабытыгар спортивнай кулууп үлэлиир. Кулууп иһинэн спортивнай сиэксийэлэр волейболга, футболга, баскетболга ыытылаллар. Ону таһынан Хаҥаластааҕы Оҕо спортивнай оскуолатын көмөтүнэн көҥүл тустууга дьарык ыытар буоллубут. Тустууга анаан рулоннаах мааты (тустар көбүөр) ылбыппыт.
Бүгүҥҥү тэрээһиммит үбүлүөйдээх сылбытын түмүктүүр тэрээһининэн буолар. Бу тэрээһиммитигэр анаан 1963 сыллаахтан үлэлээбит физкультура учууталларын көрдүүр үлэни ыыппыппыт. Спорт эйгэтигэр Аан дойду таһымнаах, ситиһиилээх, норуоттар икки ардыларынааҕы кылаастаах, ону сэргэ Россия спордун маастардара выпускниктардаахпыт. Ол түмүгэр улахан галерея оҥордубут. Егоров Сергей кик-боксаҕа Азия чөмпүйүөнэ, СНГ чөмпүйүөнэ, араас норуоттар икки ардыларынааҕы турнирдар кыайыылаахтара баар, онтон да атын дьоммутунан киэн туттабыт. Билигин тхэквондоҕа, көҥүл тустууга ситиһиилэрдээх оҕолордоохпут, онон ыччаттар үүнэн иһэллэр.
Оҕо эт-хаан өттүнэн сайдарыгар, сүүрэригэр-көтөрүгэр спортивнай былаһааккалары арыйбыппыт. Салайар кэлэктиибим учууталлара эмиэ олус көхтөөхтөр, куораппытыгар ыытыллар спартакиадаҕа өрүү кытталлар. Буулдьанан ытыыга ордук ситиһиилээхтэр, спорт атын да көрүҥнэригэр үчүгэйдэр. Биһиги баҕа санаабыт диэн, хас биирдии оҕо, учуутал чөл олохтоноругар, чэгиэн туруктанарыгар физкультура олохторун быстыспат аргыһа буоларыгар дьулуһабыт.
Түмүккэ, «Төгүрүк остуол» тула олорон оҕолор, ыччат дьон эт-хаан өттүнэн сайдыылаах, физическэй культура уонна спорт салгыы сайдыытын тула санааларын үллэһиннилэр.
Уйбаан УЙГУУРАП.