Саввин Гавриил Федорович Нөмүгү нэһилиэгэр Дөгөлөөттү тыатыгар 1914 с. кулун тутар 4-гэр төрөөбүт. Онон, баара буоллар, кэлэр сылга 110 сааһын туолуо эбит.
Гаврил Федорович ахтыытыгар суруллубутунан, кини Уулаах-Аан бастакы сүһүөх оскуолатыттан саҕалаан, салгыы Өктөм сэттэ кылаастаах уонна Дьокуускайдааҕы сэбиэскэй оскуолаларга үөрэнэр. Учуутал буолар санааннан салайтаран , педтехникумҥа үөрэнэ киирэр. Учуутал тиийбэтиттэн кинини болдьоҕун иннинэ үөрэҕин бүтэртэрэн, Нам Көбөкөнүн оскуолатыгар ыыталлар. Ити күнтэн ылата Гавриил Федорович 1975 сылга диэри үүнэр көлүөнэни иитии-үөрэтии үлэтигэр учууталынан, оскуола сэбиэдиссэйинэн, завуһунан, дириэктэринэн, барыта 45 сыл устата үөрэҕирии эйгэтигэр үлэлиир.
Үлэлиирин тухары, кэлин сынньалаҥҥа да олорон, Гавриил Федорович уопсастыбыннай үлэҕэ агитатор, пропагандист быһыытынан уонна “Знание” уопсастыба лекторынан актыыбынайдык үлэлиир. Биһиги түмэлбитигэр учууталбыт бартыбыала, туттубут учебнига, бэлэх чаһыта уонна да атын маллара баар. Биир интэриэһинэй экспонатынан халыҥ «амбарнай» кинигэ буолар. Бу кини пропагандистыы сылдьан В.И. Ленин, К. Маркс үлэлэрин үөрэппит конспега.
Нам, Чурапчы оскуолаларыгар үлэлээн баран, Саввин Г.Ф. дойдутугар кэлэн партия оройуоннааҕы кэмитиэтигэр пропаганда отделын сэбиэдиссэйинэн икки сыл үлэлээн баран 1950-1967 сс. Өктөм сэттэ кылаастаах оскуолатыгар кэлэр. Гавриил Федорович 17 сыл устата Өктөмҥө үлэлээбит оло5ун кэрчигин саамай уһуннук уонна таһаарыылаахтык үлэлээбит кэминэн ааҕара. Ити сыллар сэрии кэнниттэн олоҕу чөлүгэр түһэрэн эппиэттээх кэмигэр түбэспиттэрэ.
Республика Бастакы президенэ Михаил Ефимович Николаев ол сыллар тустарынан маннык ахтыбыт: «Мин Өктөм оскуолатыгар үөрэммит кэмим сэрии дуораана, охсуута ааһа илик сыллара этилэр. Ол да иһин буолуо, учуутал тугу кэпсээбитэ, туох үчүгэйгэ уһуйбута сүрэхпитигэр-быарбытыгар дириҥник иҥмит эбиттэр. Оччотооҕу оҕолор олох кыһалҕата күүстээх буолан сааспытыттан быдан аҕа курдук тутта-хапта сылдьарбыт, тылбыт-өспүт улахан дьоннуу буолара. Сөпкө этэллэр быһыылаах, сэрии сылларын оҕолоро тэбэнэттээх оҕо саас диэни билбэккэ улааппыттара диэн. Дьэ, онтон да тахсан кэлэрэ дуу, үөрэппит учууталларбытын уратылаах иэйиинэн, истиҥ махталбытынан ахта-саныы сылдьабыт».
Гавриил Федорович 80 сааһын бэлиэтиир юбилейыгар анаммыт Учууталы чиэстээһиҥҥэ Бастакы Президеммит М.Е. Николаев, учууталын үлэтин үрдуктүк сыаналаан, бэйэтинэн кэлэн кыттыбыта уонна киниэхэ «Саха Республикатын норуотун хаһаайыстыбатын үтүөлээх үлэһитэ» үрдүк аата иҥэриллибитин туһунан үтүө сураҕы мустубут дьоҥҥо биллэрбитэ.
Учуутал обществоҕа авторитетын, престиһын үрдэтэр сыаллаах быйыл Россияҕа Педагог уонна Уһуйааччы сыла биллэриллибитинэн уонна Өктөмҥө Арҕаа Хаҥалас бастакы оскуолата арыллыбыта 150 сылын туоларынан сибээстээн улуус бочуоттаах гражданинын, СӨ үтүөлээх үлэһитин Саввин Гавриил Федорович олоҕун кылгастык сырдатан туран, кини үөрэнээччитэ СӨ Бастакы президенэ М.Е. Николаев олоҕун акылаатын уурсубут Учууталыгар анаабыт иһирэх тыллардаах махтал суругун билиһиннэрэбин.
Валентина Ноговицына, Хаҥалас улууһун үөрэҕириитин түмэлин салайааччыта.