Чапаев сэлиэнньэтигэр баар бу сиргэ күн сирин көрбүт Саха Өрөспүүбүлүкэтин бастакы президенэ Михаил Николаев аатын сүгэр Өктөмнөөҕү билим уонна үөрэх киинигэр 240 оҕо үөрэнэр. Ону таһынан манна 75 миэстэлээх интэринээт, 8 кыбартыыралаах учууталлар дьиэлэрэ үлэлиир.
Үөрэх киинигэр барыта күн бүгүн өрөспүүбүлүкэ 18 улууһуттан оҕолор кэлэн интернакка олорон үөрэнэллэр. Манна VIII кылаастан үс хайысханан үөрэтии барар: инженернэй—техническэй, медико-технологическай уонна IT. Быйыл федеральнай бырагыраамаҕа хапсан олохтоох технопааркаҕа саҥа оборудование атыылаһан, беспилотнай көтөр ааллары оҥорон таһаарарга оҕолору уонна улахан дьону үөрэтиэхтээхтэр.
Саҥа үөрэх дьылыгар бастакы кылааска 15 кырачаан киирдэ. Үөрэнээччилэри үтүө үгэс быһыытынан Свято-Троицкай храмҥа былаҕастабыылааһын сиэрэ-туома ыытылынна. Үөрүүлээх быһыыга-майгыга оскуола үөрэнээччилэригэр уонна учууталларга бастакы чуораан чугдаарда.
Татьяна Владимирова