Сэтинньи 12-гэр Хаҥалас улууһун Чапаев сэлиэнньэтигэр, Наука дьоҕус Академиятыгар үс күннээх СӨ Бастакы президенэ Михаил Николаев аатын үйэтитиигэ Саха сиригэр үлэлиир ыччаттарга аналлаах I-кы Николаевскай форум буолан ааста. Форум тэрийээччилэринэн Ил Түмэн Судаарыстыбаннай түмсүүтэ, «Николаев-киин» архыып-библиотеката, СӨ Бастакы президенин Фондата буоллулар.
Форум сыалыгар-соругар 2032 сылга диэри өрөспүүбүлүкэ социально-экономическай сайдыытыгар кэскиллээх, стратегическай бырайыактары оҥорон киллэрии ыйыллар. Тэрээһин логотибыгар Михаил Николаев эдэр эрдэҕинээҕи хаартыскатын аныгылыы дьүһүйэн оҥорбуттарыттан бу тэрээһин иннновационнай хайысхалааҕа көстөр. Манна 30 араас улуустан 70 эдэр исписэлиис кытынна.
— Форум Балаһыанньатыгар ыйыллыбыт тиэмэлэри биһиги мээнэҕэ ылбатахпыт. Михаил Николаев кэмигэр бу күүскэ үлэлэммит хайысхалара буолаллар. Онон инникитин манна кыттыбыт исписэлиистэр судаарыстыба сайдыытыгар тахсыылаах экспертэринэн буолуохтара. Билиҥҥи ыччаттар сүрдээх көхтөөхтөр, үчүгэйгэ талаһар дьон. Ону маннык тэрээһиннэргэ түмэн элбэххэ үөрэтиэхтээхпит, — диэн СӨ Ыччат парламенын бэрэссэдээтэлэ Антон Васильев эттэ.
— Максим Аммосов, Былатыан Ойуунускай уонна да атын улуу бөлүһүөктэрбит дьоҥҥо биллэн-көстөн ыччаттар ааттарыттан үлэни саҕалаабыттара. Кинилэр оччолортон Саха сиригэр тимир суол кэлэрин, дойдубут сүрүн промышленнай өрөспүүбүлүкэ буолуохтааҕын билэр этилэр. Манна кыттар ыччаттар бырайыактара эмиэ инники күөҥҥэ таһааралларыгар эрэнэбин, – диэтэ «Хаҥалас улууһа» МО баһылыгын бастакы солбуйааччыта Гаврил Алексеев.
Түмүккэ кыайыылаах хамаанда аата билиннэ. Кинилэргэ Судаарыстыбаннай бырайыактары салайыыга үөрэххэ сертификат бэрилиннэ.
— Түбэспит тиэмэбитигэр хамаанда биир санаанан көхтөөхтүк үлэлээтэ. Бырайыакпытын оҥорууга биһигини уопуттаах салайааччыларбыт балтараа күн бэлэмнээтилэр, элбэххэ үөрэттилэр. Биһиги өрөспүүбүлүкэбитигэр, бастакытынанан, бэйэбит оҥорон таһаарар бородуксуйабытын кыайан туһаммаппыт, бренд оҥостубаппыт. Ол иһин атын дойдуларга былдьатабыт. Манна араас хайысха барыта киирэр. Иккиһинэн, дойдубут президенэ Владимир Путин этэринэн, биһиги эмиэ аргыс-куораттаныахтаахпыт, – диэн Покровскай куораттан сылдьар кыайыылаах хамаанда кыттааччыта, «Хаҥалас» хаһыат редакциятыгар социальнай ситимнэргэ үлэлиир шеф-редактор Наталья Григорьева эттэ.
Эдэр, кэскиллээх ыччакка аналлаах олус туһалаах форум буолан ааста, түмүктэри күүтэбит.
Татьяна Владимирова.