Баян көмүс дорҕооно дьиэрэһийэ турдун

Сандал саас кэлбитинэн 1-кы Малдьаҕар нэһилиэгэр Булгунньахтаахха «Баян көмүс дорҕооно” умнуллубат тэрээһин буолан ааста. Дьон-сэргэ санаатын табан тэрээһин саҕаланыан иннинэ урукку кэмҥэ улууска, өрөспүүбүлүкэҕэ биллэр, аатырбыт «Төлөн» ансаамбыл видеоклиба көрдөрүллэн улахан сэҥээриини ылыан ылла.

Аҥардас Саха Өрөспүүбүлүкэтин култууратын үтүөлээх үлэһитэ Алексей Калининскай-Луҥха Өлөксөйө баарын көрөн дьон сүргэтэ сүрдээҕин көтөҕүлүннэ. Тэрээһини В.Г. Григорьев аатынан «Дьиэрэй ырыа» Култуура киинин үлэһитэ Ирина Давыдова иилээн-саҕалаан ыытта.

1-кы Малдьаҕар урут да, билигин да аатырбыт элбэх баянистардааҕынан биллэр. Бу күн кинилэр ааттарын үйэтитэр соруктаах оҕоһуллубут видеоклип сүрэхтэниитэ буолла. Ол курдук бэйэлэрин кэмнэригэр биллэр баянистар — Афанасий Иванов, Анатолий Винокуров, Анатолий Егоров, Валерий Варфоломеев, Петр Саввинов, Геннадий Иванов, Григорий Григорьев бэйэлэрин ырыаларыгар оҕо эрдэҕинээҕи хаартыскалара киирэн оҥоһуллубут. Бу клип оҥоһулларыгар сыратын биэрбит Василий Даниловка көрөөччүлэр дохсун ытыс тыаһынан махталларын тириэртилэр. Үтүө тылынан санаан аһарылынна Булгунньахтаах оҕо музыкальнай оскуолатыгар өр кэмҥэ дириэктэринэн, баян учууталынан үлэлээбит Алексей Сергеев.

Баян сүгүрүйээччилэрэ Булгунньахтаахтан,Улахан Аантан сааланы толору кэлбиттэрэ сөхтөрдө. Николай Семёнов бэйэтин мелодиятыгар, Иннокентий Кононов-Бөртө уола тылыгар «Бөртөлөр буолабыт» диэн 2-с Малдьаҕар гимн ырыатын баян доҕуһуолунан ыллаан дьон биһирэбилин ылыан ылла.

Николай Макаров Төхтүр нэһилиэгиттэн кэлэн олохтоох мелодист Анатолий Егоров ырыаларын толороругар көрөөччү тэҥҥэ ыллаһан, дууһалыын сынньанна.

Урукку кэми санаан-ахтан баянистар өрө көтөҕүүлээхтик ыллаан-туойан кытыннылар. Алексей Калининскай-Луҥха Өлөксөйө хомус Аан дойдуга биллибитин курдук, баян тыаһа эмиэ биллиэхтээх диэн сөптөөх, олохтоох тыллары эппитин биһирии иһиттибит. Бу киэһэ кыттыбыт баянистарга, ырыаһыттарга, ыҥырыылаах ыалдьыттарга нэһилиэкпит дьаһалтатын аатыттан Махтал сурук туттарылынна.

Мин видеоклипка оҕом Григорий Григорьев үйэтитиллибититтэн астына-дуоһуйа сылдьабын, дьиэ кэргэним аатыттан махталбын тиэрдэбин. В.Г. Григорьев аатынан «Дьиэрэй ырыа» КК бары үлэһиттэригэр, тэрээһиҥҥэ сүүрбүт-көппүт дьоҥҥо, видиоклибы оҥорбут Василий Даниловка, ыалдьыт Алексей Калининскайга, кыттыыны ылбыт баянистарга, ырыаһыттарга барҕа махтал! Баян көмүс дорҕооно үйэлэр тухары уостубакка дьиэрэһийэ турдун!

Галина Григорьева, Булгунньахтаах с.