Өрөспүүбүлүкэҕэ сылгыны иитиигэ 26 племенной хаһаайыстыба баарыттан “Бөртө” сылгы собуота” ХЭУо биир бөдөҥнөрө уонна бу салааҕа уһуннук үлэлээбиттэрэ. Дьөһөгөй мөһүлгэҕэ бэлиэтэнэр сыл түмүгэр «бөртөлөр» Улахан Аанҥа «Сайдыы» диэн ааттаах саҥа хотон туттаран арыйдылар. Сиһилии дьоһун дьыала туһунан хаһаайыстыба дириэктэрэ Александр Павлов кэпсиир:
— Бу ахсыс хотоммутут буолар. Сүрүн үлэ, күрэх быһыытынан бырайыак туттарыытыттан саҕаламмыта. Сыспай сиэллээх эт боруодатын сайыннарыыга диэн сыаллаах, «Бөртө-Ас» нөнүө бырайыак суруйан, өрөспүүбүлүкэ тыа хаһаайыстыбатын миниистиэристибэтин гранын ылан, 200 төбө киирэр саҥа хотонноннубут. Турар сирэ табыгастаах, сэлиэнньэттэн ырааҕа суох, гаастаах, уоттаах. Хотоннорбут барыта ититиллээхтэр, салгыны хамнатар ситимнээхтэр. Саҥа хотоммутугар өссө иһинээҕи температууратын бэйэбит хонтуруоллуубут. Эпсиэйэ барыта базальт. Тутааччыбыт урбаанньыт, куруутун үлэлэһэр киһибит Петр Гуров. Тутуубутугар барыта 12 мөлүйүөн солкуобай барда.
Инникитин өссө үлэһиттэр олорор дьиэлэрин туттарыахпытын баҕарабыт. Тоҕо диэтэххэ, 102 үлэһиттээхпит, олор истэригэр кэлии дьон элбэх. Олор билигин Улахан Ааҥҥа дьиэ куортамнаан олороллор. Биллэрин курдук, ханнык баҕар бородууксуйаны оҥорон таһаарар тэрилтэҕэ үлэһиттэргэ кэлии-барыы буолбатын туһугар, олорор усулуобуйатын тэрийии соруга бастыкынан турар. Онон быйыл олохтоох дьаһалтаны кытта федеральнай бырагыраамаҕа киирсэн 12 дьиэ тутуутугар бырайыак оҥордубут. Бу үлэбит бигэргитиллэн өрөспүүбүлүкэ тыатын хаһаайыстыбатын миниистиэристибэтигэр көрүүгэ барбыта, быһаарыытын күүтэбит. Дьиҥэр, үлэһиттэр бэйэлэрэ дьиэ туттар буоллахтарына эмиэ туох кыалларынан көмөлөһөбүт. Оннук гынан уопсайа 30-тан тахса үлэһиттэрбитигэр дьиэ тутарга көмө оҥордубут, малааһын тэрийдибит. Түгэнинэн туһанан, бу «Хаҥалас» хаһыат нөҥүө, бэтэринээргэ наадыйабыт диэн ыҥырыы ыытабын. Ким “Бөртө” сылгы собуотун эйэлээх кэлэктиибигэр, Улахан Аан сиригэр-дойдутугар олорон үлэлиэн баҕалаахтары күүтэбит! — диэн хаһаайыстыба дириэктэрэ Александр Павлов сонунун үллэһиннэ.
Бу тыа сирин сайдыытыгар дойдубут Президенэ орто бизнеһи өйөбүлүгэр олоххо киирбит эбийиэктэриттэн биирдэстэрэ буолла.
Татьяна Владимирова.