От үлэтэ
Быйыл өрөспүүбүлүкэ барыта 435 тыһ. туонна оту, 14 тыһ. туонна сенаһы, 29 тыһ. туонна сиилэһи бэлэмниир былааннаах. Бары улуустарга от үлэтэ күүскэ барар, кэккэ улуустарга көрдөрдүү 30-40 % тиийдэ, Хаҥаласка 70%.
Өрөспүүбүлүкэҕэ сылгыны иитиигэ 26 племенной хаһаайыстыба баарыттан “Бөртө” сылгы собуота” ХЭУо саамай бөдөҥнөрө уонна бу салааҕа уһуннук үлэлээччилэртэн биирдэстэрэ. Киэҥ сирдэри тиэхиньикэнэн түргэн-түргэнник оттоон, “бөртөлөр” быйылгы былааннарын ситиһэр соруктаахтар. Сиһилии сайынҥы от үлэтин туһунан хаһаайыстыба дириэктэрэ Александр Павлов билиһиннэрэр:
Билигин Сыһыыга звенобут 395 туоннаны оттоон баран, бэҕэһээ Харыйалаах үрэх ходуһатыгар таҕыста. Уопсайа 1977 туонна оттоннубут биэс звенонан. Ордук үчүгэй көрдөрүүнү Бэтиэкэпкэ звенобут ситиһэн иһэр, 860 туонна оту уонна 281 туонна сенаһы бэлэмнээтэ. Звеноларга окко улахан аҥара эдэр ыччат сылдьар. Сиилэсчиттэр Г.М. Олесов биригэдьиирдээх звенолара650 тонна сиилэһи укта. Билиҥҥи туругунан, былааммытын 63% толордубут, саатар 80-85% гынар киһи, – диэн Александр Павлов санаатын эттэ.
…Ходуһа аайы сүүһүнэн рулоннаммыт от кэккэлэһэ сытара көрүөххэ астык. Охсуллубут от куурда да, тыраахтарынан мустаран, рулоннаан иһэллэр.
«Бөртө» хаһаайыстыбатын отчуттара үксүлэрэ арыыга көһөн киирэн оттууллар, сылгы, ынах кыстыыр отун булуналлар.
Кылгас кэмнээх сайыҥҥа Бөртө хоһуун отчуттара хас биирдии күнү былдьаһа кыстыкка этэҥҥэ киирии туһугар салгыы түбүгүрэллэр.
Татьяна Владимирова.