Хаҥалас дьоно араас таһымнаах күрэхтэһиилэргэ кытталлар. Ол курдук, Уулаах Аантан 66 саастаах Николай Припузов Россия чэпчэки атлетикаҕа Иркутскай куоракка ыытыллыбыт чемпионатыгар Саха сирин хамаандатыгар киирэн ситиһиилээхтик кыттан кэллэ. Күрэхтэһии туһунан бу курдук кэпсээтэ:
— Бу чемпионакка Россия 46 регионуттан 331 киһи кытынна. Манна 35 саастарыттан үөһээ саастаах бэтэрээннэр сүүрүүгэ тургустулар. Олимпиадалар, Европа, аан дойду ССРС чемпионнара, призердара бааллара. 96 саастаах Константин Познянскай кытынна. Саха сириттэн 10 буолан сырыттыбыт. Биһигини спорт энтузиаһа, хайыһардьыт Николай Семенов илдьибитэ. Кини урут эмиэ кыттыбыт этэ.
Мин 60 м. уһуҥҥа сүүрэн төрдүс миэстэлэнним (9,09 сөк.), бу 65-70 саастаахтарга өрөспүүбүлүкэ рекорда, уһуну ыстаныыга иккис буоллум. Мас тардыһыытыгар урут Хаҥалас чиэһин көмүскүүр Марина Федоренко (билигин Дьокуускай к.) кыттан 60 м. дистанцияҕа үһүс кэллэ.
1500 м. Мария Неустроева, Ульяна Слепцова, 3000 м. Ирина Софронова, Петр Захаров кыайыылаахтарынан буоллулар.
Үрүҥ көмүс мэтээли бэйэлэрин дистанцияларыгар сүүрэн Ион Васильев, Николай Фомин ыллылар, Николай Семенов пятиборьеҕа иккис буолла, мин – уһуну ыстаныыга. Боруонса мэтээли – Александра Ноева, Марина Федоренко. Хамаандабытыгар онон эр дьоҥҥо спорт көрүҥнэригэр 82.02 очукуону ылан саамай улахан көрдөрүүлэнним, дьахталларга – Марина кыахтааҕын көрдөрдө, — диэтэ Россия чемпионатын кыттыылааҕа.
Көрөргүт курдук, саас төһө да ырааттар, дьарыктаннахха, чөл олоҕу тутустахха, кыайыы тосхойор эбит.
Людмила Аммосова.
Николай Припузов хаартыскалара.