Елена ФИЛИППОВА, Г.В. Ксенофонтов аатынан Хаҥаластааҕы кыраайы үөрэтэр түмэл научнай үлэһитэ:
— Быйыл Покровскайга 1916-1917-сылларга Серго Орджоникидзе олорбут, федеральнай суолталаах култуура нэһилиэстибэтэ буолбут дьиэ «Биир ньыгыл Россия партия» өйөбүлүнэн «Историческая память» бырайыак чэрчитинэн сөргүтүллэн үлэҕэ киирбитэ.
Өрөмүөн үлэтин Вячеслав Яроев салайар «Уран» дизайн—устуудьуйа ыыппыта. Манна Серго Орджоникидзе туһунан кэпсиир экспозиция турар, хаҥатыллар. Санатан эттэххэ, түмэл 1962 сыллаахха арыллыбыта. Онтон саҥа дьиэ официальнай арыллыыта кэлэр сылбэс ыйыгар былааннанар. Бу Саха сиригэр култуура нэһилиэстибэтин бастакы история пааматынньыга буолар.
Людмила КОЛЕСОВА, «Өлүөнэ долгуннара» литературнай кулууп салайааччыта:
— Литературнай түмсүү чилиэнэ Натали Добрянцева үһүс кинигэтэ таҕыста. Бу кыра саастаах оҕолорго аналлаах хомуурунньугу улуустааҕы бибилэтиэкэ кинигэ кыһата тиһэн таһаарда. Төрдүс хомуурунньук тахсаары сылдьар.
Быйыл Саха өрөспүүбүлүкэтин суруйааччыларын сойууһугар поэттар Наталья Борисова-Нарыйа, Татьяна Петрова-Мойуу Кыыһа киирдилэр.
Талааннаах дьоммут элбээн иһэрэ үөрдэр – Покровскай бастакы нүөмэрдээх оскуолатын үөрэнээччитэ Гаврил Адамов түмсүүгэ киирдэ, хоһооннорунан өрөспүүбүлүкэтээҕи күрэххэ бастаата. Байыаннай дьайыыга сылдьар дьоҥҥо кинигэҕэ Сергей Макаров хоһоонноро талыллан киирдилэр.
Кэлэр сыл алтынньытыгар Хаҥаласка «Благодать Большого снега» аан дойдутааҕы фестиваль саха суругунан литературатын 125 сылыгар ананан ыытыллыаҕа, Кыайыы 80 сылынан буойун-суруйааччыларбытын Исай Никифорова, Тимофей Сметанины ахтан-санаан ааһыахпыт.
Людмила Аммосова.