Үөрэххэ, билиигэ тардыһыылаах ураты дьоһурдаах оҕолору, ону сэргэ саҥаны киллэрэр, ыччаты кытары ахсаабакка кэскил туһугар үлэлиир чулуу педагогтарга бастакы президеммит Михаил Николаев «Билиигинэн кыайыаҥ» анал истипиэндьийэтэ 2002 сыллаахха олохтоммута уонна быйыл 22-с төгүлүн туттарыллыаҕа.
Бу сыллар тухары бириэмийэ бастаан Михаил Ефимович үөрэнэ сылдьыбыт оскуолатыттан, кэлин Өктөмнөөҕү лицей буолбут үөрэх кыһатыттан саҕалаан Хаҥалас улууһун таһымыгар, онтон өрөспүүбүлүкэ ураты үөрэххэ, спортка, култуураҕа ситиһиилээх оҕолоругар, ону сэргэ чулуу педагогтарга, үөрэҕи тэрийээччилэргэ, оҕолору үүннэрэр, сайыннарар омук сирдэрин учуонайдарыгар, искусство диэйэтэллэригэр тиийэ туттарыллар буолбута. Бастакы стипендиатынан Өктөм оскуолатын физикаҕа учуутала Анна Николаевна Ситникова этэ. Онтон ыла 70 — педагог, 54 — үөрэнээччи, устудьуон лауреаттарынан буолбуттара. Ситиһиилээх ыччаттарбыт билигин дойду, омук сирдэрин киин үөрэҕин кыһаларыгар араас идэлэргэ үөрэнэн, уһуйуллан үтүөкэннээх исписэлиистэр, учуонайдар буола үүннүлэр.
Омуктартан бастакы стипендиатынан Гонконгтан бырабыыталыстыба сүбэһитэ, «Базель Групп» үөрэх тэрилтэлэрин ситимин салайааччыта Патрик Хак Чанг Лам буолбута. КиниГонконг уонна Саха сирин үөрэх тэрилтэлэрин кытары бииргэ үлэлээһиҥҥэ, уопут атастаһыыга улахан өҥөлөөҕө, устудьуоннара Саха сиригэр кэлэн аан дойду икки ардыларынааҕы интеллектуальнай оонньууларга, «Туймаада» олимпиадаларга, экспедицияларга кыттыбыттара. Михаил Николаев Россия бастыҥ үөрэх кыһаларын кытары сибээһи олохтообута.
2023 сыл түмүгүнэн общественнай хамыыһыйаҕа 64 сайаапка (47 үөрэнээччи, 17 педагог) киирдэ. Оҕолортон Анаабыр улууһун Сааскылаах оскуолатын 10 кылааһын үөрэнээччитэ Иола Бродникова, Нерюнгриттэн информационнай технологическай лицей устудьуона Дмитрий Быков, Дьокуускайтан Музыка үрдүкү оскуолатын үөрэнээччитэ Дарья Шахурдина, педагогтартан Чурапчы гимназиятыттан Мария Хоютанова, Дьокуускайтан физико-техническэй лицейц учуутала Леонид Подвигин, Пензатааҕы судаарыстыбаннай университет доцена Анатолий Власов, Дьокуускайтан Художественнай колледж преподавателэ Александра Неустроева ааттаннылар. Бириэмийэни туттарыы «Саха» НКИХ быһа биэриитигэр сэтинньи 13-гэр үөрүүлээх быһыыга-майгыга киэһэ 5 чаастан ыытыллыа.
Бастакы президеммит истипиэндьийэтэ үгүс ыччакка сайдыы суолун тэлбитэ, оҕолорбут, педагогтарбыт билиигэ-көрүүгэ, саҥаҕа интэриэстэрин тардан кэллэ, Сахабыт сирин, дойду сайдыытыгар бигэ олугу уурар. Бу чулуулартан чулууларга биһирэбил, кинилэр кыахтарын, сыралаах, түмүктээх үлэлэрин билинии, саҥа саҕахтарга суолу арыйыы буолар.
Быйыл ытык киһибит анал бириэмийэтэ, хомойуох иһин, хаһаайына суох туттарыллар…
Людмила АММОСОВА.