Аҕа дойдуну көмүскээччилэр күннэрэ биһиэхэ ураты суолталаах бырааһынньыгынан буолар. Модун санааны, хорсун быһыыны, төрөөбүт дойдуга тапталы уонна бэриниилээх буолууну кэрэһилиир. Бу күн биһиги бары дойдубутун дьоруойдуу көмүскээччилэргэ ытыктабылбытын, кинилэринэн киэн туттарбытын биллэрэн, истиҥник махтанабыт.
Аҕыйах сыллааҕыта Сунтаар улууһуттан төрүттээх Владимир Егоров АСАТУ-га үлэлии сылдьыбыта. Онтон былырыын анал байыаннай дьайыыга баран Запорожскай уобаласка Приютнай бөһүөлэккэ ытыалаһыыга түбэһэн доҕотторун быыһаары бааһыран баран суорума суолламмыта. Владимир ийэтэ Марианна Давыдова уонна аҕата Владимир Егоров иккиэн АСАТУ Өктөмнөөҕү филиал выпускниктара. Онон Өктөмҥө Аҕа дойдуну көмүскээччилэр күннэрин көрсө 25 саастаах эдэркээн Владимир Егоров сырдык кэриэһигэр анаан устудьуоннарга уонна үлэһиттэргэ буулдьанан ытыыга турнир ыытылынна.
Тэрээһин анал дьайыыга кытта сылдьан олохторо быстыбыт уолаттарбытын чуумпуран туруунан саҕаланна.Манна дьоруой Василий Егоров төрөппүттэрэ, чугас дьоно кытыннылар. Барыта 34 бэргэн ытааччы турнирга бэйэтин холонно. Күрэххэ «Куруппааскы» диэн саҥа национальнай ытыы көрүҥэ киирдэ. Балаһыанньатын быһыытынан кыттааччылар 50 миэтирэни сүүрэн кэлэн баран олорон эрэн 5 сыалы ыталлар, салгыы өссө 50 миэтирэни сүүрээтаны туран эрэн ыталлар.
Турнир түмүгүнэн кыргыттарга бастакы миэстэни Диана Старостина, иккиһи Варя Афанасьева, үсүһү Мариника Егорова ыллылар. Уолаттарга Дмитрий Марков бастаата, Дмитрий Васильев, Иван Матвеев иккис, үһүс миэстэбуоллулар. Сүрүн кыайылааҕынан, филиалга суоппарынан үлэлиир Степан Иванов таҕыста уонна дьоруой Владимир Егоров төрөппүттэрин ааттарыттан 25 тыһыынча солкуобайынан уу харчынан наҕараадаланна. Маны таһынан призердарга барыларыгар анал мэтээллэри, дипломнары туттардылар.
Быйыл норуот бүттүүнүн бырааһынньыгын Россия судаарыстыбатын дьылҕата быһаарыллар тыҥааһыннаах кэрдиис кэмигэр бэлиэтиибит, инникибит туһугар олохторун толук уурбут хорсун буойуннарбыт сырдык кэриэстэригэр сүгүрүйэбит. Эһэлэрбит, хос эһэлэрбит албан ааттаах хорсун быһыыларын ытыктыырбыт курдук, билигин кинилэри кэнэҕэски ыччаппыт умнуо суоҕа, историябытын билэр уонна харыстыыр буолуоҕа диэн эрэнэбит. Байыаннай дьайыы бэтэрээннэригэр уонна кыттыылаахтарыгар, саппааска тахсыбыт байыаннайдарга, Ийэ дойдуну көмүскээбит уонна көмүскүүр дьоммутугар барҕа махтал!
Татьяна Владимирова.