Ааҕааччыларбытыгар, көмөлөһөөччүлэрбитигэр махтал!

Үүммүт 2024 сылынан, Россия Бэчээтин күнүнэн, күндү хаһыаппыт ааҕааччылара, күннэтэ сонуннарын, санааларын  социальнай ситимнэрбитигэр кытары үллэстэр көмөлөһөөччүлэрбит,  суруйууларбытын тарҕатан норуокка тириэрдэр почталарбыт үлэһиттэрэ! Саҥа сылы улууспут икки  хаһыаттарын  951  сурутан ааҕааччылаах көрсөбүт, ол иһигэр сахалыы тыллааҕы 459 ыаллаах. Махтал, эрэлгитин биллэрбиккитигэр, биһигинниин бииргэ буоларгытыгар.

Бэчээт күнүн көрсө сүрүн көмөлөһөөччүлэрбитигэр Ермолай Скрябиҥҥа, Александр Харитоновка, Анатолий Харлампьевка, Александра Алексееваҕа, Прокопий Ноговицыҥҥа, Лидия Харитоноваҕа, Галина Семеноваҕа, Надежда Степановаҕа, Татьяна Ефремоваҕа, Саргылаана Федороваҕа, Надежда Кононовнаҕа, Надежда Татариноваҕа, Людмила Гороховаҕа, Сардаана Кириллинаҕа, Анастасия Мордовскаяҕа, Лариса Леверьеваҕа, Ульяна Степановаҕа, Наталья Владимироваҕа, Мотрена Ефремоваҕа, Парасковия Максимоваҕа, Федора Фоминаҕа, Мария Аянитоваҕа, Лира Яндрееваҕа, Варвара Кузьминаҕа, Раиса Степановаҕа, Василий Можуковка, Татьяна Петроваҕа-Мойуу Кыыһыгар  о.д.а.  махталбытын биллэрэбит. Инникитин да кэккэбит хаҥыы, сонуммут үксүү турдун! 

Бэчээт күнүн көрсө  улууспут дьаһалтатын биллиилээх суруналыыстар Афанасий Яковлев, Михаил Дьячковскай ааттарынан икки сүрүн куонкурустарбыт түмүктэрэ тахсыаҕа — оскуола оҕолоругар уонна общественнай кэрэспэдьиэннэр, суруналыыстар,  ону сэргэ быйылгыттан улуус үтүө  аатын ааттатыыга  сыралаһар социальнай ситимнэргэ үлэлэһэр блогердар, тэрилтэлэр пресс-сулууспаларын  көхтөөх үлэһиттэрин ортолоругар бастыҥнар биллиэхтэрэ. Бэчээт күнүн көрсө өссө муниципальнай тэриллиилэр ортолоругар сурутууга көмөҕө күрэх ыыппыппыт. Итини кытары «Үлэ дьоно» диэн Үлэ сылынан биллэриллибит айар күрэхпит түмүгэ тахсыаҕа (түмүгү кэлэр нэдиэлэҕэ иһитиннэриэхпит)

Хаһыакка сурутуу «Бэтэрээҥҥэ суруттар» аахсыйалаах барда. Дьэ манна  олохтоох дьаһалталарбыт, биирдиилээн үлэ кэлэктииптэрэ, араас таһымҥа талыллыбыт дьокутааттарбыт, урбаанньыттарбыт, идэлээх сойуустар  тэрилтэлэрэ көхтөөхтүк кытыннылар. Ол курдук, Мохсоҕоллоохтооҕу  цемент собуота (сал. А.З. Мамедов), Тиит Арыы, Сиинэ, Дьэр, Нөмүгү, Хачыкаат о.д.а муниципальнай тэриллиилэр үлэһиттэрэ, Улуус мунньаҕын дьокутааттара Сергей Гребнев, Анатолий Антонов, Надежда Козлова, урбаанньыт Виктор Контстантинов, үөрэҕирии, доруобуйа харыстабылын  үлэһиттэрин идэлээх сойуустарын кэмитиэттэрин салайааччылара сурутууну тэрийсэн  көмөлөстүлэр. Ыччаттар хаһыаты сайтан,  социальнай ситимнэргэ ханаалларбытыгар  ордук сөбүлээн ааҕар буоллахтарына, сааһырбыт дьоммут кумааҕы хаһыаттан сонуннарбытын билэллэрин астыналлар. Онон бу аахсыйабыт, ону сэргэ сурутуу сылы супту салҕанарын иһитиннэрэбит. Оҕолорбут  хаһыаппытыгар суруйууларын ыыталлара эбилиннэ, ааспыт сылга  түөрт уонтан  тахса  үөрэнээччи  иһитиннэриитэ таҕыста, видео-түһэриилэринэн ситэрэн-хоторон биэрии баар буолла. Онтон бу барыта Хаҥаласпыт салгыы сайдарын, дьонун-сэргэтин олоҕо тупсарын туһугар туһуланар.

 Хаһыат матырыйаалларыттан социальнай ситимнэр хото ылалларын, үксэ өрөспүүбүлүкэбитигэр  тиийэ тарҕанарын көрөбүт. Ол аата манна тахсар  суруйуулар дьону  тардаллар, итинтэн сиэттэрэн Хаҥаласпыт инникитин даҕаны инники күөҥҥэ  сылдьарын сэгэтэн көрүөхтээхпит.

Быйыл саас быһаарыылаах кэмнэр кэлэллэр, дойдубут президенин талыахпыт. Бу бүтүн Сир ийэҕэ олоххо-дьаһахха дьиксиннэриилээх быһыы-майгы күөртэнэ турар  кэмигэр  түмсүүлээх, сомоҕо буоларбыт хаһааҥҥытааҕар да ирдэнэр.

Людмила Аммосова.