Российскай Федерация президенин быыбара – дойдуга сүрүн суолталаах тэрээһин, онуоха дойдубут билиҥҥитин уонна инникитин туһугар эппиэтинэһи сүгэр хас биирдии гражданин кыттыахтаах.
Россия президенин быыбарыгар куоластааһын быйыл кулун тутар 15-17 күннэригэр буолар. Дойду сүрүн дуоһунаһыгар түөрт кандидат киирсэр — «Новые люди» баартыйаттан Владислав Даванков, билигин үлэлии олорор судаарыстыба баһылыга, бэйэтэ туруорунааччы Владимир Путин, ЛДПР лидера Леонид Слуцкай уонна КПРФ-тан Николай Харитонов.
Бу дойдубут инники сайдыытыгар улахан суолталаах хампаанньаҕа бэлэмнэнии биһиги улууска тэрээһиннээхтик бара турар. Ол туһунан кылгастык Хаҥаластааҕы территориальнай быыбардыыр хамыыһыйа бэрэссэдээтэлэ Гаврил Марков кэпсээтэ:
— 2024 сыл тохсунньу 1 күнүгэр биһиги улууспутугар 22 631 куоластааччы баар. Россия сүрүн суолталаах быыбара кулун тутар 15, 16, 17 күннэригэр барыта 30 быыбардыыр учаастакка тэриллиэ, учаастактар сарсыарда 8.00 чаастан киэһэ 20.00 чааска диэри үлэлиэхтэрэ. Улуус дьаһалтатыгар ааспыт нэдиэлэҕэ учаастактааҕы быыбардыыр хамыыһыйалар бэрэссэдээтэллэригэр анаан семинар ыытылынна. Манна өрөспүүбүлүкэ киин быыбардыыр хамыыһыйатын салайар Евгений Федоров кытынна, быыбары тэрийээччилэргэ туһалаах сүбэ-ама бэрилиннэ.
Быйыл «ИнформУИК» саҥа бырайыак үлэтин саҕалаата. Ол курдук, хамыыһыйа чилиэннэрэ быыбардааччыларга дьиэлэригэр тиийэн буолаары турар быыбар туһунан сырдатыы үлэтин ыыттылар. Ону таһынан, ким быыбар күнүгэр сатаан кэлбэтин билэн, олорго сөптөөх күҥҥэ УИК анал хамыыһыйата тиийэн сокуоннай бырааптарын толорорго көмөлөһүө. Иһитиннэрэр-сырдатар үлэ олунньу 17 күнүттэн саҕаланан кулун тутар 7-гэр диэри тэрилиннэ, учаастактааҕы быыбардыыр хамыыһыйаттан 100 чилиэн бу үлэҕэ кыттыста. Кулун тутар 5 күнүнээҕи дааннайынан барыта 8047 (76%) аадырыс хабылынна.
Саха сиригэр уустук суоллаах, ыраах сытар улуустарынан уонна нэһилиэктэринэн дойду президенин быыбарын иннинээҕи куоластааһын олунньу 25 күнүттэн саҕаламмыта уонна кулун тутар 14-гэр диэри салҕанар. Биһиги улууска маннык ыраах сытар 6 пуун баар, уопсайа 60 куоластааччы кыттара былааннанар. Биир бастакынан Улахан Ааннааҕы 634 №-дээх учаастактааҕы быыбардыыр хамыыһыйа чилиэннэрэ «Бөртө» хаһаайыстыба сылгыһыттарыгар дойду президенин быыбарын иннинээҕи куоластааһыны ыыттылар.
Ольга Гермогенова.