Тиит Арыы нэһилиэгин түс-бас ыала Татьяна, Валерий Романовтар Чкаловка отут аҕыс сыл олордулар. Алта оҕолоох, уон биир сиэннээх дьоһун дьон, үлэ бэтэрээннэрэ. Аҕа киһи эдэригэр тутууга, пилорамаҕа үлэлээбитэ, оттон далбар-хотун арыы собуотугар үлэлии кэлэн баран ыал буолта. Күннэтэ үүт туттараллар. Күһүн идэһэлэнэн, эт атыылаан ыччаттарыгар көмөлөһөллөр, эбии дохуоттаналлар.
Элбэх сүөһүгэ элбэх от оттонор, быһа холоон 35 туонна от.
Үгэстэринэн Үөс Кумахха уонна Сыһыыга Наамаҕа үрдүгэр баар ходуһаларыгар оҕолорунаан, сиэннэринээн хотуулаахтык оттууллар. Тиэхиньикэлэрэ диэн кэбиһиигэ биир «Беларусь» тыраахтыр, охсор, мунньар икки «Синтайдаахтар». Куһаҕан сирдэригэр илии хотуурунан түһүнэллэр. 10-13 саастаах түөрт сиэн көмө дьон – от мунньаллар, лэкэлииллэр, улахан кыргыттара түстүүллэр. Үтүө күннэри туһанан бэркэ оттоотулар. Үлэһит, иллээх, ыччаттардаах ыалы киһи көрө астынар.
Варвара Кузьмина