Далбар-хотуттарбытыттан холобур ылыаҕыҥ!

Анал байыаннай дьайыы кыттыылаахтарыгар «Бары бииргэ!» — акция уҕараабат көмөтө балысханнык бара турар. Хаҥалас улууһун Өктөмүгэр хас да хайысханан үлэ ыытыллар.  “Сардаҥа” үҥкүү түмсүүтэ олортон биирдэстэрэ (салайааччыта Анна Федорова-Дулгуйаана). Бу түмсүү күн-бүгүн байыаннай дьайыыга үгүс көмөнү оҥоро олорор. Ыҥырыы күүппэккэ ханна көмө баарынан кэрэ аҥардарбыт иннилэрин хоту баран иһэллэр, ыал ийэлэрэ, эбэлэрэ, саха далбар-хотуттара итиини-куйааһы билиммэккэ, тымныыны-тоҥууну аахсыбакка, сайыннары-кыһыннары өрүү инники күөҥҥэ, үлэ үөһүгэр сылдьаллар. Билсиһиэххэйиҥ. Анна Федорова салайыытынан үлэлииллэр: Варвара Христофорова, Галина Острельдина, Екатерина Шадрина, Надежда Туралысова, Октябрина Олесова о.д.а. Ахсынньы 3 күнүгэр «сардаҥалар» Дьокуускайга Пушкин аатынан библиотекатыгар «Бары бииргэ!» аахсыйаҕа кыттан кэллилэр. Кинилэр бу курдук сатаан санаабат сүдү үлэлэригэр күүс-көмө буолан, суһал толоруулаах үлэ көһүннэҕинэ биир да сынньалаҥа суох, кыл-мүччү эбиэттээт буор босхо үлэ үөһүгэр түһэллэр. Ардыгар үлэ түбүгэр киэһэ буолбутун билбэккэ хаалаллар.

Ыксаллаах түгэн көстөн иһэр…

Хатыламмат долгутуулаах көстүү да буолар. Биирдэ үлэ үөһүгэр олордохторуна ааннарын аһан үгүс элбэх тутуурдаах аа-дьуо эдэрчи нуучча дьахтара киирэн кэлбит. Идэтинэн английскай тыл учуутала. Барыта көмөҕө аналлаах ииһин аҕалбыт. Каасканы таһынан маскировочнай сиэккэ, уллуҥахха уктар угунньук, харысхалары о.д.а. Биир-биир хааһахтан хостуур курдук малларын ороон истэҕин аайы хас кини хамсаныыта, туттара-хаптара, олус долгуйара көрөргө ураты көстүүнү биэрэр этэ. «Бу эдэр-кээн ийэни көрө олороммун олус долгуйбутум, уйадыйбытым», — диэн кэпсиир Анна Павловна. — Мантан көрдөххө, дьон омугуттан тутулуга суох, бары биир өлүүгэ сылдьар эбиппит. Өссө биир түгэни ахтан аһарыым, уопускаҕа кэлбит буойун-саллаат кэлэ сылдьан махталын биллэрбитин. Ол уол кэпсииринэн биирдэ кинилэр Украина наймыласпыт сэрииһиттэрэ харса суох артиллериянан, дронунан ытыалаан, буомбалаан барбыттарыгар түбэспиттэр. Олох өндөйөр, быгар да бокуой суох. Өлүү-сүтүү бөҕөтө буолбут. Бу буойун биир маскировочнай сиэккэни ылан бүрүммүт, муннугар сурук бэлиэтэ баара үһү. “Ону бүрүнэн өлөр-тиллэр икки ардынан, мунан-тэнэн икки чааһы быһа онон-манан сыыллан, хойуу буруону быыһынан, тохтоло суох ыйылыы сыыйыллар буулдьаны аннынан баччаҕа кэлиэх быабар бэйэ дьоммун этэҥҥэ булбутум, — диэн буойун-саллаат ахтыбытын. Оннук, муҥура суох махталын биллэрбитэ. Биһиги элбэх буолан үлэлии сылдьабыт. Барыбыт санаата бииргэ түмүллэн кэлбитин сүрэхпитинэн-быарбытынан сэрэйэбит”, — диир энтузиаст-салайааччы.

Мин көрдөхпүнэ, сакаас сүрдээҕин кэлэ турар, адьас бириэмэ тиийбэт да балаһыанньата буолар эбит. Ардыгар буойун-саллаат бэйэ-тинэн киирэн кэлэр, эмиэ көмө көрдүүр. Манна тулуур ирдэнэр эбит, мин санаабар, санаа барыта бииргэ түмүллэн «Кыайыы туһугар!» чахчы даҕаны ылсыбыт дьыалаларыгар булгуччу бэриниилээх, дьиҥ-чахчы норуотум туһа диэн бу биир дойдулаахтарым үлэлэһэ сылдьар эбиттэр! Кинилэри көрөн киһи эрдийэр, киэн туттар, өлөн-охтон биэрбэт эбиппит диэн.

Бүгүн кэлэн саллааттарга көмө буола сылдьар дьон үксүбүт сахалар. Ол иһин буоллаҕа буолуо, бары испитигэр Алгыһынан ботугуруу турабыт…

Мантан көстөр, хас биирдии Саха сирин олохтооҕо Ийэ дойдутугар муҥура суох бэриниилээҕэ.

Алгыс баһа сыалаах буол-лун диэн туран, кэскилбит туһугар, бар дьонум, биир ньыгыл сомоҕо буолуоҕуҥ диэн ыҥырабын, үтүө санаалаах далбар-хотуттарбытыттан холобур ылыаҕыҥ!

Андриан Белолюбскай-Өлкөрөй.