Данил Карпов: «Дойдубуттан атын сиргэ олоруохпун баҕарбаппын, үлэбин  сөбүлүүбүн…»

«Якутскэнерго» ПАО Киин электрическэй ситимнэрин пресссулууспата.

«Якутскэнерго» ПАО Киин электрическэй ситимин УлаханАаннааҕы учаастагар Данил Карпов маастарынан  үлэлээбитэ отуттан тахса сыл буолла. 

Покровскайдааҕы РЭС 26000 квадратнай миэтэрэ иэннээх түөрт учаастак- таах. Мантан  Карпов учаастага  сүүс кв.км иэннээх түөрт нэҺилиэк сэлиэнньэлэрин — Тиит Арыыны, Тумулу, Улахан Ааны, Булгунньахтааҕы хабар, биэс тыҺыынча   кэриҥэ нэҺилиэнньэни  уотунан хааччыйан олорор.   150-200 миэтэрэ буола-буола  туруоруллубутут остуолбаларынан тардыллыбыт ситиминэн  электричество нэҺилиэктэргэ тиийэр.

Карпов учаастагар бөдөҥ  тыа хаҺаайыстыбатын эбийиэктэрэ  бааллар. Хас да хаҺаайыстыбаҕа тыҺыынчанан ынах сүөҺү уонна сылгы тутуллан турар. Балар үгүс  электроэнергияны тутталлар. 

— Энерго-хаһаайыстыбам киэҥ, онон түбүк элбэх, — кэпсиир Данил Васильевич,-  Учаастактарга уот остуолбаларын уларытар буоллахха, бүтүн ситими саҥардыы үлэтэ ирдэнэр, эргэрбит боробулуоханы аныгы СИП-кэ (самонесущие изолированные провода дэнэр)  уларытабыт. Хас күн аайы сарсыарда 8 чаастан киэҺэ 5 чааска диэри үлэлиибит, сезон устата хас биирдии остуолба хайдах туруктааҕын көрүү эрэйиллэр. Бу өссө ситимҥэ саахал тахсыбат кэмигэр.

Саахал арыт тахсааччы. Ситим  аҥар өттүгэр барыыта 50 км усталаах,   быстыы таҕыстаҕынан тута ханна алдьаммытын була охсон чөлүгэр түҺэрии  ирдэнэр. Дьэ манна үксүгэр ыксалынан суос сатыы  ырааҕы хаамыы буолар — техника сорох сирдэргэ кыайан тиийбэт буоллаҕа, ордук сайыҥҥы өттүгэр. Үрэхтэр кыҺынын да арыт тоҥмокко сытар буолаллар. Дьэ манна  дроннар көмөлөөх  буолуо эбиттэр даҕаны, ардыгар  атаҕыҥ эрэбил курдук. БиҺиэхэ суол кытыытынан  уот ситимэ мээнэ ааспат, сүнньүнэн ойуурдары уҥуордаан   маҺа кэрдиллибит просекаларынан тардыллан турар.

Данил Карпов салайыытынан бу  уот хаҺаайыстыбатыгар биэс электромонтер уонна биригээдэ массыынатыгар, буровойга икки суоппар үлэлииллэр. Бары олохтоох, ыал буолбут дьон, саамай эдэрдэрэ 32 саастаах. Атын үлэҕэ көҺө сатааҺын манна  суох. «Якутскэнерго» өрөмүөн үлэтигэр  программатынан былааннанан үлэ эрэллээхтик барар. Уот ситимэ уонна энерго-эбийиэктэр сыллата саҥардылла тураллар.

Данил Васильевич  төрөөбүт-үөскээбит  Улахан Ааныгар   олорор. Куорат сирин   дууҺата ылымматын этэр,  кини ханна да ыксаабакка холкутук сылдьарын ордорор киҺи. «Манна ханна да сырыт —  бэйэ дойдута, дууҺаҥ сытар  сөбүлүүр үлэлээххин, бэйэҥ илиигининэн туппут дьиэлээххин, — диир кини, — Миигин Покровскайга тэрилтэҕэ кылаабынай инженеринэн ыҥыра сылдьыбыттара,  барбатаҕым. Намҥа үлэлии сырыттахпына улуус дьаҺалтатыгар үлэҕэ ылаары гыммыттарын эмиэ аккаастаан турабын. Биирдэ өссө ОБХСС-тан кэлэ сылдьыбыттара, дьиэ бириэх буолтара, барбатаҕым буоллаҕа. Дойдубар үлэлиирбин ордоробун. Отуттан тахса сыл биир сиргэ үлэлээн кэллим. Биллэн турар, ардыгар сыллата барыта хатыланар үлэ курдук эрээри, мин оннук санаабаппын, сонун».

Тыа сирин маастара хас сырыы аайы Өлүөнэ өрүҺүн биэрэгинэн   айаннаан иҺэн   дойдутугар баарын туохтааҕар да астынарын этэр: «Бу мантан мин хаҺаайыстыбам саҕаланар! Бу уот ситимэ, постанциялар  — барыта миэннэрэ!» диэн үөрэ бэлиэтиир.

«Якутскэнерго» ПАО Киин электрическэй ситимнэрин пресссулууспата.