Дьэр нэһилиэгэр Сылгыһыт күнэ буолан ааста. Сааскы ылааҥы күн нэһилиэк сылгыһыттара, тыа хаһаайыстыбатын үлэһиттэрэ «Айылгы» култуура киинигэр мустан Татыйаана Слепцова алгыс тылын иһиттилэр, баһылык Егор Исаков эҕэрдэтин туттулар.
Тэрээһин кыттыылаахтара Бөдьөкө уола Маһары кэминээҕи таҥастарга маарыннатан тигиллибит соннору кэтэн хаартыскаҕа түстүлэр. Салгыы Култуура киинигэр киирэн сахалыы ас арааһын амсайдылар.
Бу бэлиэ күн Егор Исаков өр сыллар усталарыгар сылгынан дьарыктанар үлэһит дьоҥҥо нэһилиэк уонна улуус Тыатын хаһаайыстыбатын департаменын наҕараадаларын туттарда.
Улуус борокуруорун солбуйааччы Елена Дохунаева кыттыылаах Төгүрүк остуолга сылгыһыттар өртөөһүн, суолга сүөһүнү массыына түҥнэри көппүт түбэлтэтигэр сокуонунан көмүскэнии, бэйдиэ сылдьар ыттары бэрээдэктээһин уо.д.а. боппуруостарга кэпсэттилэр. Ырытыллыбыт боппуруостар тыа сирин олохтоохторугар ордук суолталаахтарынан сибээстээн, кэлэр нэдиэлэҕэ сиһилии суруйуохпут.
Кирилл Черепанов.