Төрөөбүт тыл, сурук-бичик күнүгэр
Булгунньахтаах сэлиэнньэтигэр Төрөөбүт тыл, сурук-бичик күнүгэр аналлаах дьиэ кэргэнинэн квест-оонньуу ыытылынна. Оонньуу сыала-соруга саха тылын-өһүн киэҥ эйгэҕэ тарҕатыы, оҕо төрөөбүт тылын билэр, ытыктыыр, өрө тутар, төрөөбүт тылынан кэпсэтэр буоларын ситиһии уонна Дьиэ кэргэн, оҕо сылынан нэһилиэк общественнай-культурнай олоҕор дьиэ кэргэннэр көхтөөх кыттыыларын көҕүлээһин буолла.
Күрэххэ биир ыалтан 3 киһилээх төрөппүт, оҕо уонна дьиэ-кэргэн чилиэнэ хамаанда тэринэн үс ыал кытынна. Оонньуу 4 түһүмэхтээх буолла. Бастакы түһүмэххэ түргэн ыйытыктар, саха тылын билиигэ тургутук буолла. Иккис түһүмэххэ кыттааччылар саха суруйааччыларын төһө билэллэрин көрдөрдүлэр, салгыы айымньылары Хаҥалас улууһун историятын билиигэ тургутууну аастылар.
Дьүүллүүр сүбэҕэ «Айар кытыл» литературнай түмсүү кыттыылааҕа Раиса Архипова, Булгунньахтаах орто оскуолатын испэсэлииһэ Сардана Иванова, «Дьиэрэй ырыа» КК дириэктэрэ Ефремова Татьяна үлэлээтилэр. Оонньуу саҕаланыытыгар «Айар кытыллар» Иван Гоголев-Кындыл «Ийэ тылым» диэн хоһоону, Виктория Олесова салайааччылаах 7 кылаас уолаттара сахалыы хоһоон ааҕан иһитиннэрдилэр.
Түөрт түһүмэх түмүгүнэн Соловьевтар дьиэ кэргэттэрэ бастаатылар. Иккис миэстэ Моисеевтар, үһүс миэстэни Алексеевтар дьиэ кэргэттэрэ ыллылар. Бу күн сыл бастыҥ ааҕар дьиэ кэргэн анал аатын Лидия, Александр Павловтар дьиэ кэргэттэригэр туттардыбыт. Тэрээһиҥҥэ кыттыбыт дьоммутугар улахан махталбытын тириэрдэбит. Бу курдук мэлдьи кинигэни атас-доҕор оҥосто сылдьаргытыгар баҕарабыт.
Анисия Дьяконова, Булгунньахтаах олохтоох библиотекатын сэбиэдиссэйэ.