Дохсун аты көлүнэн, чуораан тыаһын лыҥкынатан кэлэн ыалдьыттаһар үтүө үгэс баара…

Иркутскай — Дьокуускай почта суола арыллыбыта 280 сылыгар

Бу күннэргэ Хаҥаласка Иркутскайтан Дьокуускайга диэри почта суола арыллыбыта 280 сылынан араас тэрээһиннэр ыытылла тураллар.

Ол курдук, «Саргы түһүлгэтэ» култуура киинигэр Мохсоҕоллоохтон  «Бубенцы над Леной» фольклорнай ансаамбыл ыалдьыттыы кэлэн «Ямщицкий перезвон» айар кэлэктииби  кытары көрсүһүүлээх посиделка тэрийдилэр. Манна  олохтоохтор көхтөөхтүк  кэлэн кыттан  дьаамсыктар  үгэстэрин билистилэр, ырыаларын-үҥкүүлэрин тэҥҥэ «түһэрсэн»  астык  киэһэни бэйэлэригэр уонна ыалдьыттарыгар бэлэхтээтилэр.  

Дьаамсыктар сыдьааннарын тэрээһиннэрэ хаһан да чуҥкук буолбат. Бу күн   урукку көлүөнэлэрин оонньууларын оонньоотулар, билиһиннэрдилэр, умнуллан эрэр  «Краковяк», «Переходной» диэн  элбэх киһи кыттар үҥкүүлэрин көрдөрдүлэр, кэлбит дьоҥҥо  үөрэттилэр. Таабырына,  скороговорката, частушката уонна пляската суох буолбатылар. Ырыа бөҕөтө ылланна.

 Маннык дьоро киэһэни, дьаамсыктардыы «посиделканы», Сиинэҕэ «Алгыс» култуура уонна спорт киинигэр  «Реченька» норуодунай кэлэктиип тэрийдэ. Эмиэ элбэх былыргы ырыаны  иһитиннэрдилэр, урукку үҥкүүлэри, ол иһигэр умнулла быһыытыйбыт «Пляска боком» үҥкүүнү  билиһиннэрэн үөрэттилэр. «Ручеек», «Веретено», «Бой петухов» оонньуулар, араас күрэхтэр буоллулар.

Онтон Бэстээххэ «Олимп» КСК-ҕа «Хранители времени» диэн видеоролигы көрдөрүү, «По следам государевых ямщиков» диэн кинигэ быыстапката буолла. Бу күн дьаамсыктар астарын-үөллэрин  ыалдьыттарга амсаттылар, Биллэн турар, маннык  көрсүһүүлэр ырыата-пляската суох ааспаттар. Бу да сырыыга  Россия араас муннуктарыттан кэлбит дьаам дьонун сыдьааннара көрсүһэн астынан бардылар. Манна олохтоох «Сударушка» ансаамбыл  көрү-нары көҕүлүттэн тутта.

 Уопсайынан, дьаамсыктар сыдьааннара тэрийэр «посиделкаларыгар» киһи  хаһан да чуҥкуйбат, санаата көнөн, дууһата сырдаан төннөр. Урукку өттүгэр  маннык көрсүһүүлэр ыарахан үлэ кэнниттэн аралдьыйа түһэргэ, төрүттэрин ырыаларын, үҥкүүлэрин, оонньууларын оонньоон дууһалыын уоскуйан кэлэргэ  төрүөт буолаллара. 

…Станцияттан станцияҕа аттарын киэргэтэн-симээн, чуораан тыаһынан лыҥкынатан  Өлүөнэ эбэбит устунан  көтүтэн тиийэн  бэйэ-бэйэҕэ ыалдьыттаһан эдэрдэр билсэр этилэр, үөрэ-көтө ыалдьыттаһан, сонуннарын үллэстэн  астынан, күүстэригэр күүс эбинэн кэлэллэрэ. Дьэ манна биллэрэ  ким хорсуна-хоодуота, сыыдам аттааҕа, көрү-нары сатаан көҕүлүттэн тутара. Балалайка, хормуоска,  көрдөөх оонньуулар ыччаттары түмэллэрэ. Манна биһиги эҥэрдэр омугуттан тутулуга суох кытталлара Мин дьонум, сахалар, Дьура дьаамыттан Ой-Мурааҥҥа тиийэллэрин хойукка дылы ахталлара… Дьаам почта суола оччолорго доҕордоһуу, ил-эйэ, инникигэ эрэл, сайдыы суола этэ.

Людмила Мордовская.