90-с урусхаллаах сылларга биһиги дойдубут олус ыараханнык олорбута, ону ким да мэлдьэспэт. Хамнас кэмигэр кэлбэт этэ, буруйу оҥоруу элбээбитэ, тыа хаһаайыстыбата, оҥорон таһаарыы бородууксуйатын сайдыыта быстар мөлтөх этэ, бүтүн дойду үрдүнэн. Ол ыарахан кэмнэргэ Владимир Путин урусхалламмыт дойдуга эппиэтинэс ылынан, оччоттон баччаҕа диэри дойдубутун тэтимнээхтик сайыннаран кэллэ.
Билиҥҥи ыччат, аныгы көлүөнэ дьоно хайдахтаах курдук кэмнэр кэлэн ааспыттарын билбэт буоланнар, уопсастыбаны сайыннарар тиэмэлэргэ араас кэпсэтиилэри ыыталлар. Билигин, арҕаа дойдулар Арассыыйа утары үлэ ыытар кэмнэригэр биһиги хаһааҥҥытааҕар түмсүүлээх буолуохпутун наада.
Мин урбаанньыппын, тыа сиригэр олорор, үлэлиир-хамсыыр киһибин, дьиэ кэргэннээхпин. Бизнес сайдарыгар чэпчэтиилээх кирэдьииттэр бааллар, көмө араас миэрэлэрэ үлэлииллэр. Эдэр, элбэх оҕолоох дьиэ кэргэттэргэ муҥутуур элбэх көмө баар, бу оҕолор этэҥҥэ улааталларыгар сүрдээх сүҥкэн көмө буолар дии саныыбын.
Николай Назаров, «Проект» ХЭТ салайааччыта, 1-кы Малдьаҕар нэһилиэгин олохтооҕо.