Василий Ильин дириэктэрдээх Хаҥалас улууһун Оҕону эбии үөрэхтээһин киинин көҕүлээһининэн Покровскай куорат 2-с №-дээх орто оскуолатыгар “Дойдуга бэриниилээх буолуу” сүбэ-мунньах ыытылынна.
Улууспут оскуолаларыттан ОБЖ предметин учууталлара, Хаҥалас улууһун физическэй культураҕа уонна спортка салаатын салайааччыта Виталий Прокопьев кыттыыны ыллылар. Бастыҥ учууталлар Сахабыт сиригэр физкультурнай хамсааһын 100 сылынан түөскэ кэтиллэр анал бэлиэлэри үөрүүлээх быһыыга туттулар.
Покровскай куорат 2-с №-дээх орто оскуолатын дириэктэрэ Сергей Владимиров дойдуга бэриниилээх буолуу туһунан санаатын үллэһиннэ, үөрэх кыһатыгар ыытыллар үлэни билиһиннэрдэ, Ис дьыала, МЧС уонна баһаары утары охсуһар чаастары кытта үлэлэһэр хайысхалардаах социальнай-правовой кылаас арыйан үлэлэтэллэрин кэпсээтэ.
Семинар кыттыылаахтарын ортолоругар ааспыт күһүн Новгородскай уобаласка Старая Русса хайысхатыгар эрэгийиэннэр икки ардыларынааҕы Өйдөбүнньүк вахтатын чэрчитинэн көрдүүр экспедицияҕа кыттыбыт дьон бааллара семинар биир сүрүн тиэмэтэ буолла. Манна Хаҥалас улууһуттан Саха сирин улахан бөлөҕөр киирэннэр улуус оҕону эбии үөрэхтээһин киинин дириэктэрэ Василий Ильин, Покровскайдааҕы гимназия физкультураҕа учуутала Николай Латышев уонна Бэстээх орто оскуолатыттан Юрий Нарахаев буолан Аҕа дойду Улуу сэриитин уоттаах хонуутугар охтубут буойуттарбыт кырамталарын көрдүүр үлэтигэр балаҕан ыйын 22 күнүттэн алтынньы саҥатыгар дылы сылдьыбыттар.
— «Билиэххэ, ытыктыахха, ыйдүү сылдьыахха» бырайыак ааптара СӨ “Ветеран” Ассоциациятын чилиэнэ, Социальнай сайдыы уонна Үлэ министиэристибэтин иһинэн “Кыайыы” социальнай көмүскэл Ресурснай киинин тэрийэр отделын сүрүннүүр исписэлииһэ Наталья Васильева ыҥырыытынан көрдүүр этэрээккэ киирсэн барбыппыт. Тиийээт, тута, Новгород уобалаһын Омычкино дэриэбинэтин чугаһыгар, аатырбыт “Долина” диэн көрдүүр түмсүүнү кытта, чуолкайдаан эттэххэ, Игорь Неофитов диэн хамандыырдаах «Память» диэн көрдүүр этэрээти кытта үлэлээтибит. Үксэ бадарааннаах, үрдүк хатыҥнардаах сир. Киһи кырыктаах кыргыһыылар буолбут сирдэрин этинэн-хаанынан билэр, атын турукка киирэҕин. Анал тимири көрдүүр тэрилинэн үлэлиигин. Онтубут хас миэтэрэ ахсын тыаһыыр. Сэбиэскэй да саллааттар, ньиэмэстэр да малларын, сэрии да сэптэрин булаттаабыппыт. Биһигиттэн чугас 3 көстөөх сиргэ Цемена диэн дэриэбинэ аттыгар, Чурапчы улууһуттан икки учуутал салайааччылаах, үөрэнээччилэр «Звезда» диэн көрдүүр этэрээти кытта сылдьыбыттара. Ити курдук Таатта улууһуттан эмиэ оҕолор, улахан дьон да бааллар үһү. Биһиги сорох булбут малларбытын аҕалбыппыт, — диэн Николай Семенович көрдүүр этэрээккэ сылдьыбыттарын туһунан анал слайдалары көрдөрө-көрдөрө иһитиннэрдэ.
Бу кэпсэтии кэнниттэн семинар кыттыылаахтара, Хаҥалас улууһуттан аны сайын атырдьах ыйыгар, көрдүүр этэрээти тэрийэн ыытыахха диэн биир санааҕа кэллилэр. Үүнэн иһэр көлүөнэ ыччат Аҕа дойду Улуу сэриитин, онно кыттыбыт буойуттар хорсун быһыыларын өрүү өйдүү сылдьалларын туһугар үлэ өрүү ыытыллыахтаах. Сахабыт сирин хас биирдии ыалын сэрии хаарыйан ааспыта. Хаҥалас улууһуттан олус элбэх киһи сэриигэ ыҥырыллан сылдьыбыта уонна хорсуннук сэриилэспитэ. Ким да умнуллубат, туох да умнуллубат!
Уйбаан УЙГУУРАП.