Бу 2020 сыл тохсунньу 17-гэр РФ Юстиция министиэристибэтигэр судаарыстыбаннай регистрацияны ааспыт «Саха өрөспүүбүлүкэтигэр I-кы тииптээх спиноцеребеллярнай атакциялаах, онтон да атын нейродегенеративнай ыарыылардаах пациеннар регионнааҕы общественнай тэрилтэлэрин Ассоциацията» диэн уустуксоҕус ааттаах коммерческайа суох тэрилтэ биригээдэтэ улууспут Киин балыыһатын ыҥырыытынан балаҕан ыйын 23-29 күннэригэр Хаҥаласка кэлэ сырытта.
Бөлөх састаабыгар бу Киин неврологология салаатын сэбиэдиссэйэ Ю.И.Хабарова, ревматолог- быраас А.С Михеева, лаборант-быраас С.Д.Ефремова, лаборант-биолог А.В.Крылов, Ассоциация бэрэссэдээтэлэ, научнай үлэһит генетик-быраас О.Г.Сидорова Тиит Арыыга, Тумулга, Булгунньахтаахха, Улахан Ааҥҥа, Мохсоҕоллоох бөһүөлэгэр уонна Покровскайга 15 нэһилиэнньэлээх пууннартан ыҥыран барыта 370 ыарыһахтары (ол иһигэр 6 киһини дьиэлэригэр тиийэн) көрдүлэр, консультация биэрдилэр. Ити иннинэ 165 Хаҥалас олохтоохторугар медико-социальнай анкетирование ыытылла сылдьыбыта.
Научнай киин исписэлиистэрэ бу күннэргэ 189 пациентан ыарыыларын быһаарарга молекулярнай-генетическай чинчийиигэ биоматырыйаал ыллылар, 51 киһи киэнин салгыы биохимическай чинчийиигэ ыыттылар, 29 ыарыһаҕы ЯНЦ КМП киирэргэ ыҥырдылар.
Эмчиттэр улууспут кылаабынай бырааһыгар А.П. Протодьяконовка, кини солбуйааччытыгар А.В.Спиридоноваҕа, нэһилиэнньэлээх пууннар медпууннарын үлэһиттэригэр күүс-көмө буолбуттарыгар махтаннылар.
Таарыччы эттэххэ, Научнай киин кэлэктиибэ Саха сиригэр бу үлэни дойду президенэ Владимир Путин тэрийбит граннарын пуондатыттан үс төгүл, онусэргэ СӨ Ил Дархана Айсен Николаев гранын икки төгүл ылары ситиһэн ( 8 мөл. солк.) ыытар кыахтанна. Киин үлэһиттэрэ онон Саха сирин 11 улуустарыгар маннык биригээдэлэринэн сылдьан кыһалҕалаах дьоҥҥо көмөлөһөр кыахтаннылар, ол иһигэр быйыл Хаҥаласка уонна Намҥа. Научнай үлэһиттэр, эмчиттэр салгыы граннарга кытталлар. Кыаллыннаҕына инникитин улууспут соҕурууҥҥу уонна илин эҥэр нэһилиэктэригэр даҕаны кэлэ сылдьыахтара, кыһалҕалаах дьону миэстэтигэр көрөн-истэн, сүбэ-ама биэрэн көмөлөһүөхтэрэ диэн эрэнэбит.
Биһиги, улахан-ааннар, эмчиттэрбитигэр кэрэ-бэлиэ сирдэрбитин көрдөрдүбүт, түмэллэрбитин билиһиннэрдибит, туһалаах үлэлэрин иһин махтанан атаардыбыт.
Парасковия МАКСИМОВА, социальнай педагог. Улахан Аан сэл.