Бырабыыталыстыба отчуотун Төхтүргэ Физическэй култуураҕа уонна спортка миниистир Леонид Спиридонов салайар бөлөҕө туруорда. Олохтоохтор маннык отчуот ыытылларын биһирииллэрин эттилэр, саҥа уһуйаан үлэҕэ киирэн эрэринэн, аны 40 кыбартыыралаах дьиэ тутулларыттан үөрэллэрин тириэрдэн туран, араас эйгэттэн долгутар боппуруостарын хото биэрдилэр, аһаҕастык санааларын эттилэр.
Тыа дьонун сүөһү иитиэҕи ходуһа хаппата, өртөөһүнү сөргүтүү, сыана үрдүү турара, хаарбах дьиэлэртэн дьону көһөрүү бырагырааматыгар эргэ кэтэх дьиэлээхтэри киллэрбэттэрэ, автобус сатабыла суох расписаниенан сылдьара, Өлүөнэ муостата тутуллан эрэринэн ууга да барар куттал баара о.д.а. долгутар.
Улуус отчуотугар туруоруллубут кыһалҕалары эмиэ иһиттибит. Ол курдук, Төхтүргэ 50 хаһаайыстыба сүөһүнү тутар, нэһилиэнньэҕэ эт-үүт бородууксуйата куттала суох буолуутугар саҥаттан саҥа сокуоннар тахсаллар, ирдэбил улаатар даҕаны, үлэлииргэ усулуобуйа мөлтөҕүн, саатар бэтэринээринэй пуун дьиэтэ суоҕун, баһаарынай массыынаҕа гараас тутуллара наадатын, үүт харчыта кэмигэр кэлбэтин, бензин, сэлээркэ ыарыырын кытары нолуоктарга эҥин төлөбүрдэр үрдүү туралларын, оччотугар хайдах дьаһанан олоробут, хайдах күннээҕи кыһалҕалартан ордорунан эбии техника ылабыт, тутууну ыытабыт диэн боппуруостар тура сырыттылар. Отчуокка кэлбит биэдэмистибэлэр, министиэристибэлэр исписэлиистэрэ сөптөөх хоруйдары биэрэ сатаатылар. Өлүөнэ муостатын тутууну бырайыактааһыҥҥа улахан үлэ барбытын, барыта экспертизаланан олоххо киирэн эрэрин, халаан уута дэриэбинэлэргэ суоһуо суохтаах диэн быһаарыыны дьон син ылыннылар даҕаны, дьиксинии син биир хааллаҕа.
Төннөн иһэн оччуоттарга, хас даҕаны сиргэ нэһилиэнньэни кытары көрсүһүүлэр тугу ордук туруорсаллары улуус баһылыгын солбуйар Юрий Никифоровтан ыйыттым, онуоха кини дьон эрдэттэн быһаарынан баран кэлэн кэпсэтиигэ дьыалабыайдык кыттар буолбуттарын бэлиэтээтэ.
Видео: https://t.me/gazetahangalas/34741
Людмила Мордовская.