Доруобуйа национальнай күнүгэр
Быйыл Саха сиригэр Доруобуйа национальнай күнэ олохтоммута 25 сыла. Бу күнү 2000 сыллаахха өрөспүүбүлүкэ Бастакы президенэ Михаил Николаев хас биирдии дьиэ кэргэҥҥэ, үлэ кэлэктииптэригэр уонна өрөспүүбүлүкэҕэ чөл олоҕу түстүүр туһугар, XXI үйэҕэ норуот уйгутун үрдэтиигэ духуобунай, майгы-сигили уонна эт-сиин доруобуйатын бастакы суолталаах оруолун билинэн туран бигэргэппитэ.
Олунньу 25-тэн кулун тутар 5 күнүгэр диэри ыытыллар Доруобуйа национальнай күнүгэр анаммыт декада иитинэн бүгүн Покровскайга «Спорт Дыбарыаһыгар» нэһилиэнньэ доруобуйатын дьаарбаҥката тэрилиннэ. Манна ким баҕалаах кэлэн Хаҥаластааҕы киин балыыһа, общественнай доруобуйа уонна медицинскэй профилактика өрөспүүбүлүкэтээҕи Киинин, Дьокуускадааҕы РКВД испэсэлиистэригэр көрдөрүннүлэр. Терапевт, отоларинголог, эндокринолог, невролог, кардиолог, офтальмолог, онколог быраастарга босхо консультацияны аастылар. Ону сэргэ, нэһилиэнньэ араас ыарыыларга экспресс-тестирование, анаалыс туттаран, УЗИ-ланан, ЭКГ түһэн уо.д.а. түргэн чинчийиини ааһан доруобуйаларын туругун биллилэр, сүбэ-ама ылан салҕыы наадалаах эмтэниини ааһар буоллулар.
Видео: https://t.me/gazetahangalas/35356
Ольга Гермогенова.