Амма улууһун Болугур нэһилиэгэр быйыл от ыйын 22-27 күннэригэр Нуучча дуобатыгар Саха сирин чемпионата ыытыллынна. 10-эр дьон уонна 10 дьахтар күрэхтэстилэр.
Хаҥалас оскуолатын үөрэнээччитэ 16 саастаах Айсен Егоров эр дьоннор ортолоругар дуобакка Саха сирин чемпиона буолла. Кини Саха сирин күүстээх дуобатчыттарын, аан дойду гроссмейстердарын кэннитигэр хаалларан, кыайыылаах таҕыста.
Айсен бастакы оонньууга гроссмейстеры, аан дойду чемпиона Иван Токусаровы кытта оонньоото. Аан дойду хас да төгүллээх чемпиона Гаврил Колесовтыын тэҥнэстэ. Айсен аан дойдутааҕы гроссмейстердары Николай Гуляевы, Николай Стручковы, Андрей Федотовы кыайталаата. Норуоттар икки ардыларынааҕы кылаастаах гроссмейстердар Гаврил Колесов иккис уонна Николай Стручков үһүс көрдөрүүлэннилэр.
Айсен Егоров – Россия спордун маастара, 100 харахтаах дуобакка Россияҕа бастакы миэстэлээх, билигин олох күүскэ оонньуу сылдьар, бу күрэхтэһиигэ бастаабыта кини кыаҕын дакаастаата, улахан таһымҥа оонньуурун көрдөрдө.
Дьахталларга Дьокуускай куораттан гроссмейстер Сандаара Апросимова бастакы, Россия спордун маастардара Хаҥаластан Юлия Никанорова иккис уонна Горнай улууһуттан Туйаара Федорова үһүс миэстэлэннилэр.
Бу ситиһиилэринэн спортсменнарбыт Россия чемпионатыгар кыттарга путевка туттулар. Өркөн өйдөөхтөр оонньуур дуобаттарын күрэҕэр үрдүк ситиһиилэри баҕарабыт!
Василий МОЖУКОВ, СӨ спордун бэтэрээнэ, Покровскай к.