Уот сэрии ортотунан
Хаҥалас Кытыл Дьуратыттан Аҕа дойду Улуу сэриитигэр 143 киһи ыҥырыллан барбыта, онтон 85 эрэ дойдутугар эргиллэн кэлбитэ. Алексей Миронов олортон биирдэстэрэ этэ, бойобуой Кыһыл Сулус уордьаннаах, алта мэтээллээх, Ленинград оборонатын кыттыылааҕа.
1941 сыллаахха сэриигэ айаннаан иһэн 200 киилэлээх борокуот дьаакырын көтөҕөн көрбүт диэн сөҕө кэпсииллэрэ, бэрт күүстээх, бэйэтин кыанар, хары баттаһыытыгар тэҥнээҕин булбат, Молотов аатынан колхоз биир чулуу үлэһитэ этэ. Кинини Чааркаан диэн ааттыыллара.
Алексей Петрович мэтириэтэ билигин улууспут дьаһалтатын дьиэтигэр чулуу дьоммут кэккэтигэр ыйанан турар. Кини уоттаах сэриигэ төбөтүгэр улаханнык бааһыран, элбэх эппэрээссийэни ааһан инбэлиит буолан 1943 сыллаахха дойдутугар кэлбитэ. Сыҕааҕын баана сылдьара… иэрчэҕэ туппат этэ. Хайдах аһаан-сиэн сылдьарын санаатахха, ыарахан. Бу дьаам киһитин кэлин дьон Сыҥааҕа суох Өлүөскэ диэн ааттыыр буолтара. Мин редакцияҕа саҥа үлэлиир сылбар кини туһунан хаһыаппар суруйан турабын. Олус олоххо көхтөөх, түргэн-тарҕан туттуулаах үтүөкэннээх оһохчут этэ. Оскуола голландка дэнэр оһохторун оҥороро. Буору, кирпииччэни кытары бодьуустаһан тиритэ-хорута үлэлии сылдьара харахпар бу баар курдук. Сэрии туһунан син кэпсиирэ даҕаны, өйдөөн хаалбатахпын. Оҕо аймахха аламаҕай киһи этэ.
Кэргэнэ Варвара Петровналыын уон оҕолоохторо, эйэ-дэмнээх ыал этилэр. Варвара бастакы кэргэнэ Якушевтартан этэ, сэриигэ баран өлбүтэ, Василий диэн уоллааҕа. Элбэх оҕолоохпун диэн дьиэҕэ олорботоҕо – үөлээннээхтэрин кытары холкуоска хонуу үлэтигэр сылдьара, бэрт холку, сэмэй киһи этэ. Кэлин дьоруой-ийэ балыыһаҕа техүлэһитинэн сылдьыбыта, Володя диэн уолларын кытары оскуолаҕа бииргэ үөрэммитим. Билигин Мироновтар оҕолоро Кытыл Дьураҕа хаалбатылар даҕаны, куоратынан, тыанан тарҕаһан олороллор, үлэһит маанылара буоллулар.
Людмила Аммосова.
Д.Е. Мордовской хаартыскаҕа түһэриитэ.