Михаил Николаев Махтал суруга
Хас биирдии киһи олоҕун усталаах туоратыгар бэрт элбэх дьону кытта алтыһар. Ол эрээри кини өйүгэр—санаатыгар, үйэ—саас тухары сүрэҕэр—быарыгар оһуобай миэстэни ылан иҥэн хаалбыт дьоннор бааллар. Мин республика Президенынан үлэлии сырыттахпына, ардыгар, тоҕо бу учууталлары олус өрө тутаҕын диэх курдук ыйыталлара. Онуоха толкуйдуу түһэн баран олоҕум араас кэрчиктэрин ырытан көрдөхпүнэ: чахчы даҕаны төрөппүт ийэм кэнниттэн мин дьылҕабар иккис оруоллаах дьонунан учууталлар буолаллар эбит.
Биир оннук киһинэн быйыл 100 сааһын туолар миигин Өктөм сэттэ кылаастаах оскуолатыгар V, VI, VII кылаастарга историяҕа үөрэппит уонна уһун кэмнэргэ оскуола дириэктэринэн үлэлээбит Саввин Гавриил Федорович буолар. Кини бу иннинэ олус уустук кэмнэргэ араас эппиэттээх үлэҕэ сылдьыбыт буолан оскуола коллективын үөрэх-иитии үлэтин тэрийиини кыайа тутара. Оҕолору үлэнэн иитиигэ улахан болҕомтотун уурара, биология учуутала Зоя Зосимовна Родионова салалтатынан оҕолор араас бэйэлээх оҕуруот аһын үүннэрэллэрэ, Каландаришвили аатынан колхоз окко-маска үлэлэригэр актыыбынайдык кытталлара, олохтоох МТС дириэктэрин Кардашевскай Егор Егоровиһы кытта оскуолабыт директора Гавриил Федорович ыкса үлэлэһэр этэ, хас сайын ахсын үөрэнээччилэр үлэ лааҕырдара бэрт тахсыылаахтык үлэлиирэ, оскуолабыт икки корпуһугар уонна интернакка уонтан тахса оһоххо мас бэлэмнээһинэ бэрт көхтөөхтүк ыытыллара, физкультурнай-спортивнай үлэҕэ, художественнай самодеятельноска оскуолабыт оройуоҥҥа биир бастыҥнар ахсааннарыгар сылдьара, оскуола ис-тас көрүҥэ ыраас буолуутугар, кэмигэр сөптөөх өрөмүөнү ыыттарыыны Гавриил Федорович улахан дирбиэнэ-дарбаана суох оҥотторбут буолааччы. Ол да иһин күн бүгүҥҥэ диэри 140 сааһын туолар оскуолабыт улахан корпуһа хамсаан да көрбөккө турар. Аны кини уруоктара олус интэриэһинэйдик бараллара, бэйэтин лоп-бааччы тылынан-өһүнэн, үөрэтэр оҕолоругар боччумнаах, убаастабыллаах сыһыанынан дууһаларын тутара. Кини үтүө санаата, билиигэ-көрүүгэ тардыһарбытыгар көмөтө, сүбэтэ-амата миэхэҕэ күүс-көмө буолбута олус элбэхтик туһалаабыта.
Аны санаатахха, кини дириэктэр быһыытынан оччотооҕу кэмнэргэ нэһилиэк иһинээҕи хаһаайыстыбаннай, бары общественнай тэрилтэлэри, кинилэр күүстэрин-кыахтарын оскуолаҕа түммүт, тарпыт эбит. Ол иһин күн бүгүн Өктөмҥө “Өлүөнэ дойдута” физико-математическай форум, лицей үлэлээһиннэрэ, дойдуга киэҥник биллэр Москватааҕы Ломоносов аатынан университеты, Россиятааҕы Бауман аатынан техническай университеты уонна онтон да атын аан дойдуга биллэр үрдүк үөрэх заведениеларын кытта ыкса сибээстэһиилэр, республиканскай, российскай, норуоттар икки ардыларынааҕы оҕолор ортолоругар предметнай олимпиадалар ыытыллыылара, талааннаах оҕолору мунньан сайыҥҥы оскуолалары үлэлэтии, Якутскайдааҕы сельхозакадемия филиала аһыллан үлэлээһинэ, билиҥҥи көрдөбүллэргэ эппиэттиир үөрэнэр-олорор дьиэ уот тутуллуута – бу барыта Гавриил Федорович биэс уонус сылларга ууран кэбиспит акылаатын кытта ыкса сибээстээх. Онон биһиги бары ытыктыыр, сүгүрүйэр учууталбыт, дириэктэрбит Гавриил Федорович олус ырааҕы өтө көрөн үлэлээбит эбит диэн түмүккэ кэлэбин. Билиҥҥи үйэҕэ чахчы даҕаны республика, дойду сайдыытын сүрүн ресурсатынан айылҕа баайа буолбакка билии-көрүү, интеллект таһыма, инновациннай научнай-техническай, технологическай ырытан оҥоруулар, производство үрдүк культурата буолалларын киһи үксэ өйдөөн эрэрэ кэрэхсэбиллээх.
Республика биир кырдьаҕас учууталын, патриотун, Хаҥалас улууһун бочуоттаах гражданинын, инникини ыраах өтө көрөн үлэлээбит директорбыт Гавриил Федорович 100 сыллаах уонна Өктөм оскуолата үлэлээбитэ 140 сылынан бары үөрэнээччилэри, учууталлары, төрөппүттэри, обществоннаһы ис сүрэхпиттэн эҕэрдэлиибин уонна кэнэҕэһин даҕаны оскуо-ла сайдыытыгар чаҕылхай ситиһиилэри, сырдыкка-кэрэҕэ, билиигэ-көрүүгэ саҥа үктэллэри баҕарабын.
10.03.2014.
М.Е.Николаев, СӨ Бастакы Президенэ, РФ Госдуматын депутата, Өктөм 7 кылаастаах оскуолатын выпускнига.