Кулун тутар 21 күнүгэр Покровскай 1-кы №-дээх орто оскуолатыгар өрөспүүбүлүкэтээҕи “Өбүгэ үгэһин утума” научнай-практическай кэмпириэнсийэ-бэстибээл ыытылынна. Уус-Алдан, Нам, Мэҥэ Хаҥалас, Хаҥалас улуустарыттан уонна Дьокуускай куораттан барыта 102 кыттааччы кыттыыны ыллылар.
Тэрээһин арыллыытыгар Хаҥалас улууһун баһылыгын солбуйааччы Юрий Никифоров, Хаҥалас улууһун үөрэҕирии салалтатын начаалынньыга Павел Аргунов, улуус дьокутааттарын бэрэссэдээтэлин солбуйааччы Борис Протодьяконов кэмпириэнсийэ кыттыылаахтарын эҕэрдэлээтилэр, билиҥҥи кэмҥэ төрөөбүт ийэ тылбыт сүтэр кутталга киирдэр да, сэҥээрээччи оҕолор баалларын уонна кинилэргэ эрэнэллэрин туһунан баҕа санааларын тиэртилэр.
Кэмпириэнсийэ-бэстибээл барыта 6 секциянан үлэлээтэ, дьүүллүүр сүбэҕэ СӨ үөрэҕириитин үтүөлээх үлэһитэ, педагогическай наука кандидата, төрүт тыллары харыстааһын институтун сүрүннүүр эксперэ Федоров Г.М., СӨ үтүөлээх артыыската, виртуоз-хомусчут, музыкальнай колледж преподаватела Варвара Степанова-Арчыына, РСФСР үөрэҕириитин туйгуна, Российскай Федерация үөрэҕириитин Бочуоттаах үлэһитэ Капиталина Скрябина, СӨ култууратын туйгуна, норуот маастара Азияна Харлампьева, СӨ үтүөлээх учуутала Юлия Дмитриева уо.д.а. истэн-көрөн сыаналаатылар, кыттааччыларга сүбэ-ама биэрдилэр.
Бу улахан тэрээһини тэрийэн ыыттылар — Хаҥалас улууһун дьаһалтата, үөрэҕирии, култуура салалталара уонна И.М. Яковлев аатынан Покровскай 1-кы №-дээх орто оскуолата.
Научнай-практическай кэмпириэнсийэ-бэстибээлигэр улууспут баһылыга Олег Иринеев Кылаан Чыпчаал кыайыылаахтарыгар бэйэтин анал бирииһин туруорда. Ол курдук оһуокайга Саян Бардеев, Покровскай 1-кы №-дээх орто оскуолатын 8-с кылааһын үөрэнээччитэ, олоҥхоҕо Афанасьев Владик, 2-с Малдьаҕар орто оскуолатын 9-с кылааһын үөрэнээччитэ, хомуска Тапыева Сарыада, А.И. Борисов аатынан Төхтүрдээҕи култуура киинин аатыттан кыттыбыт оскуола үөрэнээччитэ. Кылаан Чыпчаал кыайыылаахтара улууспут баһылыгар Олег Иринеевкэ бэйэрин махталларын тиэртилэр.
Тэрээһин үрдүк таһымнаахтык ааспытын кыттааччылар, дьүүллүүр сүбэ, салайааччылар бэлиэтээтилэр. Билиилээх бастыҥа биһирэбил ылла, өркөн өйдөөх үтүөтэ өрөгөйө үрдээтэ, нарын-намчы хомус тыаһа дьон сүргэтин көтөхтө, уран тыл алыбын эриэккэһэ Олоҥхо дойдутугар сирдээтэ.
Тэрээһин кыттыылаахтара Ийэ тылбыт сүппэтин, салгыы сайдарын туһугар үлэлэһэр санаалаах тарҕастылар.
Людмила Горохова, Покровскай 1-кы №-дээх орто оскуолатын саха тылын уонна литературатын учуутала.