Хаҥалас улууһугар II-c Дьөппөҥҥө «Октябрь 50 сыла совхоз» ТХПК-ны Ил Түмэн дьокутаата Тихон Скрябин хорутуулаахтык салайар. Аҕыйах сыллааҕыта нэһилиэккэ тыа хаһаайыстыбатын туруга олус уустуга, ону дойдутун туһугар ис сүрэҕиттэн ыалдьар Тихон Николаевич көрө-истэ сылдьан ылсыһан, билигин дьон-сэргэ үлэҕэ тардыһар хаһаайыстыбатынан буолла. Киниэхэ биригэдьииринэн Дьокуускайдааҕы тыа хаһаайыстыбатын техникумун бүтэрбит эдэр киһи Винокуров Артур үлэлиир.
— Биригэдьиирдээбитим иккис сыла, быйылгы кыстыкка уопсайа 125, ол иһигэр ыанар ынахпыт 105 төбө сүөһү кыстаан турар. Маассабай төрүөх олунньу, кулун тутар ыйдарга саҕаланыаҕа. Сүөһүгэ, биллэн турар, иҥэмтэлээх аһылыгынан хааччыйыы биһиэхэ сүрүн сорукпутунан буолар. Күөх оту таһынан эбии жмыҕынан аһатабыт, саас эбии зеленка кэлиэхтээх, — диир хаһаайыстыбаҕа үлэни тэрийээччи.
Ханна да тиийдэххэ хаһаайыстыбаларга эдэр дьон үлэлии сылдьаллара көрөргө-истэргэ олус үчүгэй. Бары инникигэ эрэллээх, иитэр сүөһүлэрин төбөтүн ахсаанын элбэтэр туһугар туруулаһан үлэлии сылдьаллар. Сорох хаһаайыстыбалар сүрүн кыһалҕалара хотонноро эргэтэ буолар.
Бу үүммүт дьылга СӨ Ил Дархана Айсен Николаев этии киллэрбитинэн, үүтү туттарыы иһин 1 киилэҕэ көрүллэр субсидия 65 солкуобай буолбута тыа сирин сүөһү иитээччилэрин сүргэлэрин көтөҕөр.
Уйбаан УЙГУУРАП.