З.В.Решетникова төрөөбүт-үөскээбит Чараҥын олохтоохторо: Ефремовтар, Канаевтар, Решетниковтар, Жуковтар, Павловтар, Васильевтар, Григорьевтар ааттарыттан Вера Корнилова.
Хаҥалас улууһун чулуу кыыһа Зоя Васильевна Решетникова баара буоллар быйыл 90 сааһын туолбут буолуо этэ.
Бу Чараҥтан төрүттээх биһиги биир дойдулаахпыт бэйэтин дьулуурунан, билиитинэн-көрүүтүнэн, тэрийэр дьоҕурунан, дьоҥҥо сиэрдээх сыһыанынан 1973-1983 сылларга, оччолорго Орджоникидзевскай дэнэр Хаҥаласпыт оройуонун өрөспүүбүлүкэҕэ аар-саарга аатырдан олорбута. Зоя Решетникова СӨ Үрдүкү Сэбиэтигэр дьокутаатынан икки төгүл талылла сылдьыбыта, Миниистирдэр сэбиэттэригэр үлэлээбитэ. Ханна да үлэлээтэр ытыктабылынан туһанар Киһи киһитэ этэ. Кининэн биһиги киэн туттабыт, кулууппутугар киниэхэ анаан стендэлээх, үлэтин-хамнаһын, сорох тутта сылдьыбыт малларын көрдөрөр муннук тэрийбиппитин ыалдьыттар кэрэхсии, ытыктыы көрөллөрүн билэбит.
Зоя Васильевна олохтон барбытын кэннэ хаҥаластар бюстаах пааматынньыгы оҥотторон баран табыгаһа суох сиргэ туруортарбыттара билигин аанньа көрүүтэ-харайыыта суох турарыттан хараастабыт, хомойобут. «Хаҥалас» хаһыакка суруналыыс Людмила Аммосова туруорсуутун өйүүбүт уонна дьоммут-сэргэбит сүгүрүйэн, тохтоон санаан-ахтан ааһар сиригэр көҺөрөргө туруорсабыт.
З.В.Решетникова төрөөбүт-үөскээбит Чараҥын олохтоохторо: Ефремовтар, Канаевтар, Решетниковтар, Жуковтар, Павловтар, Васильевтар, Григорьевтар ааттарыттан Вера Корнилова.
Пааматынньык оннун буллаҕына сатанар
Зоя Васильевна Решетникова пааматынньыгын көһөрөргө көрдөһөр ытыктабыллаах биир дойдулаахтарым ыстатыйаларын ааҕан баран сөпсөһөбүн.
Зоя Васильевна салалтатынан өр сыл үлэлээбит киһи буолабын. Эриэккэс кэрэ, дьаһаллаах киһи этэ. «Саргы түһүлгэтин» иннигэр турар пааматынньыгын аттынан ааһан иһэн бииргэ үлэлээбит сылларбын санаан ылабын.
Култуура киинин тутуллуутун хара маҥнайгыттан туруорсубут кини этэ. Ол умнуллубат. Ол эрээри кини туруорсубута, туттарбыта бу эрэ буолуо дуо, оройуоҥҥа үгүс буоллаҕа. Партия райкомун бастакы сэкиритээрин Александр Ягнышевы кытары олус да табыллан, таһаарыылаахтык үлэлээбиттэрэ. Ол иһин билиҥҥээҥҥэ диэри уос номоҕор сырыттахтара. Зоя Васильевна барахсан Өлүөнэ өрүһүн олус да ытыктыыра, төһөлөөх кини киэҥ киэлитинэн кыһыннары-сайыннары айаннаан командировкаларга сылдьыбыта буолуой, ааҕан сиппэккин. Ол бэйэтэ Эбэтигэр көхсүнэн олорор…
Данил Аргунов, СӨ бочуоттаах тутааччыта.
* * *
Мин этиибин ылынан санааларын үллэстибит дьоммор махталбын тириэрдэбин.
Аҕыйах хонуктааҕыта «Саргы түһүлгэтэ» култуура киинин дириэктэрин Лариса Владимированы көрсөн санаатын иһиттим. Зоя Решетникова туһунан Абыйтан саҥа үлэлии кэлэн баран элбэх үтүө тылы истибитин, ол эрээри миигин кытары сөбүлэһэрин, ити биир күһүн быһааран соһуччу үөһэттэн туруорбуттарын эттэ. Кини пааматынньык, кырдьык, табыгаһа суох сиргэ турарын, култуура дьиэтин тэлгэһэтэ сотору кэминэн бырайыак оҥоһуллан саҥардыллан, кэҥэтиллэн аныгылыы көрүҥнэнэн өрөмүөннэниэхтээҕин иһитиннэрдэ.
Людмила Аммосова.