«Сиинэ Кустуга» оҕо үҥкүү ансаамбыла «Азия оҕолоро» VIII Норуоттар икки ардыларынааҕы спортивнай Оонньуулар култуурунай тэрээһинигэр кыттарга ыҥырыы тутан үөрүүлэрэ муҥура суох. Онон үҥкүүһүт оҕолорбут саҥа көстүүм тиктэллэригэр көмөлөһөр соруктаах «Өйөбүл кэнсиэрэ» ыытылынна. Манна Сиинэ нэһилиэгин олохтоохторо, тэрилтэ үлэһиттэрэ, биирдиилээн дьон, общественнай түмсүүлэр, урбаанньыттар көмө оҥордулар.
Өйөбүл кэнсиэргэ араас сылларга «Сиинэ Кустуга» ансаамбылга үҥкүүлээн кэлбит ыччаттарбыт, төрөппүттэр уонна билигин үҥкүүнэн дьарыктанар оҕолор кытыннылар. Ансаамбыл бастакы тэрийээччилэринэн Антонина Егоровна Асекритова, Любовь Семёновна Федорова, Ульяна Афанасьевна Иванова, Марианна Степановна Константинова, Ольга Павловна Иванова буолаллар. Кинилэри бу биэчэргэ махтанан туран ахтан-санаан аастыбыт.
Кэнсиэр бүтүүтэ ааҕар хамыыһыйа иһитиннэрбитинэн, бу киэһэ барыта 156 тыһ солк. көмө киирбит. Ансаамбыл салайааччыта Антонина Асекритова билигин да көмө анал счёкка кэлэ турар диэтэ. Ону сэргэ, сүрүн спонсорынан биһиги улууспут киэн туттар дьокутаата Алиш Мамедов буолла. Бука бары күүс-көмө, өйөбүл буолбут дьоҥҥо улахан махтал! Инники кэскиллэрбит, оҕолорбут улахан тэрээһиҥҥэ үрдүк таһымнаахтык кыттан кэллиннэр диэн Сиинэ олохтоохторо алгыы хаалабыт.
Ульяна Степанова, Сиинэ с.