#Нэһилиэктэргэ
Чапаев сэлиэнньэтигэр Николаев-Кииҥҥэ бэтэрээннэр «Дьиэрэй» хордара Улуу Кытайга айаннарын, Аан дойдутааҕы «Муора матыыптара» куонкурус-бэстибээлгэ ситиһиилээхтик кыттыыларын туһунан биир дойдулаахтарыгар биһирэм киэһэҕэ дуоһуйа кэпсээтилэр.
Хор салайааччыта, СӨ култууратын туйгуна Ирина Протопопова айан сыалын-соругун, Благовещенскайга дылы «Рукавишников” поеһынан дойдубут кэрэ айылҕатын көрө-көрө айаннарын туһунан кэпсээтэ. Бу айаннаан иһэн хор саамай аҕам саастаах кыттыылааҕа Полина Петровна Андреева төрөөбүт күнүн бииргэ бэлиэтээбиттэрин астына, махтана сырдатта.
Елизавета Горшанова Хэйхэ, Харбин, Бэйдайхэ куораттарга тугу сөҕө көрбүттэрин, хайдах электропоеһынан айаннаабыттарын, айантан дуоһуйбутун үллэһиннэ. Маннык элбэх буолан сылдьар, атын сири-дойдуну көрөр астыгын бэлиэтээтэ.
Салгыы Ирина Васильевна бу үрдүк таһымнаах куонкуруска Россияттан, Кытайтан 387 кыттааччы баарын, Саха сириттэн икки хор уонна оҕолор бөлөхтөрө ситиһиилээхтик кыттыбыттарын, бэстибээли олохтоох телевидение быһа биэриинэн сырдаппытын, Наталья Ксенофонтова кытайдар сөҕүмэр үрдүккэ тутуллубут хамсыыр, барыта таас дьикти муосталарын туһунан кэрэхсэбиллээхтик кэпсээтилэр. Бэтэрээннэр Татьяна Трифонова, Ольга Кривошапкина, Николай Кычкин Кытай куораттарын бэлиэ сирдэринэн, дыбарыастарынан, храмнарынан сылдьыбыттарын, бу дойду дьикти айылҕатын, циркаҕа уот шоулары, аатырбыт Кытай истиэнэтин, гостиницаларын, астарын-үөллэрин туһунан экраҥҥа көрдөрдүлэр.
Мария Николаева Араҕас муора тоҕо итинник ааттаммытын, туох уратылааҕын, дуоһуйа сөтүөлээбиттэрин сырдатта. Ольга Лиханова кытайдар олус истиҥник көрсүбүттэрин, сэҥээрэн, ыалдьыттары кытта хаартыскаҕа түһэллэрин, олус үөрэллэрин бэлиэтээтэ.
Бэтэрээннэр айаннарын устата улуу Кытай араас көстүүлээх тутууларыгар, миэстэлэригэр, муора кытылыгар хаартыскаҕа түһэн үйэтиппиттэр.
Ырыаһыттар Кытайга кыттыыларын туһунан телевидениеҕэ «Саҥа күн» биэриигэ, Саха радиотыгар кэпсээн тураллар.
Бу дьоро киэһэҕэ кэлэр көлүөнэ бэтэрээн дьону, ийэлэрин, аҕаларын, эһээлэрин, эбээлэрин, ону ааһан Эркээни хочотун кэрэ сирдэрин мэлдьи көрө-истэ, ырыаларыттан истэ сылдьыахтара диэн айар талааннаах «Дьиэрэй» түмсүү хора икки ырыаны клип гына устан бэлэхтээтилэр. Бу үлэни барытын хор салайааччыта Ирина Протопопова иилээн-саҕалаан оҥоттордо. Михаил Тимофеев тылыгар, композитор Кирилл Герасимов музыкатыгар «Сахам сирин халлаана», Күннүк Уурастыырап тылыгар, Марк Жирков музыкатыгар «Дьол, үөрүү ырыата» видеоклип уһуллубутун көрдөрдүлэр, кэпсээтилэр.
Улуу Кытайга буолбут Аан дойдутааҕы «Муора матыыптара» куонкурус-бэстибээлгэ бэтэрээннэр хордара ситиһиилээхтик кыттыбыттарынан Хаҥалас улууһун култуураҕа уонна духуобунай сайдыыга управлениеттан Сахаайа Громова, Өктөм нэһилиэгин дьаһалтатыттан Людмила Алексеева, Өктөмнөөҕү Култуура киинин дириэктэрэ Федора Фомина, «Эрэл» түмсүү аатыттан Любовь Кондакова Махтал суруктары туттардылар.
Түмсүү салайааччыта Клавдия Кривошапкина үбүлүөйгэ спонсордаабыт тэрилтэ салайааччыларыгар, көрөөччүлэргэ махтанна, хорга кэлэн ыллыылларыгар ыҥырда, хорбут салайааччытыгар махтанан сибэкки дьөрбөтүн туттарда.
Көрсүһүүнү дьиэрэйдэр «Төгүрүк алааскын эн таптаа» ырыанан түмүктээтилэр.
Клара Томская.