Өктөмҥө өрөбүллээҕи дьаарбаҥка

Нэһилиэк олоҕо

Күннээҕи үлэттэн ордон кылгас өрөбүлбүтүгэр билэр дьоҥҥун кытта тиһэх сонуннары сэһэргэһэн, ирэ-хоро кэпсэтэн сынньанар олус үчүгэй. Ол курдук, Өктөм нэһилиэгин олохтоохторо бу өрөбүлгэ дьаарбаҥкаҕа мустан аралдьыйдылар.

Манна урбаанньыттар эрэ буолбакка, ким баҕалаах тугу сатыылларынан оҥоһук арааһын оҥорон тэлгэттилэр.Аҥаардас ону-маны атыылаһа эрэ буолбакка талааннаах дьону кытта сирэй көрсөн-билсэн элбэҕи эбиниэххэ эмиэ сөп.

Көрдөххө, дьон эпоксиднай сымалаттан билигин арааһы барытын оҥорор буолбуттар.

Алина Слепцова бу күн кэрэ бижутерияны, брелоктары аҕалан атыыга таһаарда:

— Бу сымала убаҕас, онно араас өҥнөрү булкуйан анал халыыпка кутан хаппыт сибэккини, сэбирдэҕи эбэндьикти дизайнерскай оҥоһуктары оҥоруохха сөп. Мин манан 2019 сыллаахтан дьарыктанабын. Киһи тутатына сатыыр технологията буолбатах эбит. Бастаан оҥорорго уустук соҕус, түргэн-тарҕан, үөрүйэх туттуу ирдэниллэр. Оҥоһуктарбын үксүн интернет ситиминэн атыылыыбын. Маннык дьарбаҥкаларга олору дьон син хамаҕатык ылаллар, онон бу туһалаах тэрээһин дии саныыбын. Ордук бэйэм саастыылаах кыргыттар интэриэһиргииллэр.

Надежда Гурьева нэһилиэккэ торт астаан атылаабыта үс сыл буолбут. Бүгүн дьарбаҥкаҕа саҥа үөрэх дьылыгар анаан торт арааһын уонна десерт атыыга бэлэмнээбит:

— Торт үксэ сакааһынан уонна интернет ситимигэр биллэрии көмөтүнэн тарҕатыллан атыыланар. Үгүс дьон медовай торт сөбүлүүллэр эбит. Конкуренция баар да буоллар, хас биирдиибитигэр атыылаһааччы көстөн иһэр. Инникитин өссө десерт арааһын оҥоруохпун баҕарабын. Дьиэбитигэр эмиэ бырааһынньыкпыт торт аһа суох ааспат.

Розалья Бубякина дьарбаҥкаҕа саамай элбэх оҥоһугу аҕалбыт, илиитигэр дьоҕурдаах маастар. Оҥоһуктарынан көрдөххө, быысапкалыыр, оҕуруонан тиһэр, сутаж техниканан араас киэргэллэри оҥорор, күрүчүөгүнэн баайар эбит. Розалья дьэрэкээн сахалыы симэхтэри,хаачыстыбалаах аныгылыы бижутерияны оҥорбут:

— Мин 75 сааспар үктэммитим. Маннык дьарыктаммытым ыраатта. Ыһыахха анаан кыһыны быһа олус элбэх киэргэли оҥорбутум, онтон ордубутун бу бүгүнҥү дьарбаҥкаҕа аҕаллым. Дьон үксүн сахалыы тематикалааҕы атыылаһаллар, ол иһин бу кэнники муодаҕа киирбит кыргыттар суһуохтарын киэргэллэринарааһын оҥорон аҕаллым.

Дьарбаҥка кэмигэр оҕолорго анаан бириистэрдээх оонньуу ыытылынна. Бу күн хас биирдиибит дьиэлээхтэригэр минньигэс кэһиилээх уонна да атын илии тутурдаах тарҕастыбыт. Бары нэһилиэк урбаанньыттарыгар үлэлэригэр ситиһиилэри, саҥа сүүрээннэри баҕарабыт.

Татьяна Владимирова