«2019-2025 сс. хаарбах уонна саахалланар туруктаах дьиэлэртэн дьону көҺөрүү» өрөспүүбүлүкэтээҕи бырагыраама чэрчитинэн тутуллар бастакы түөрт этээстээх 27 кыбартыыралаах олорор дьиэ Өктөмҥө дьэндэйэр.
Бу күннэргэ дьиэ хоруобуйата бүрүллэн түннүктэрэ турбуттар, балконнара оҥоҺуллубут – үлэ түмүктэнэрэ чугаҺаабыт. Манна «АЭБ Капитал» тутуу хампаанньатын биригээдэлэрэ үлэлии сылдьаллар. Кинилэри кэлэн иҺэр дойдубут Тутааччыларын күнүннэринэн эҕэрдэлии таарыйа, эбийиэктэригэр киирэн үлэни билистим:
— ИҺинээҕи үлэлэрэ хаалан тураллар: перила оҥоруу, кырааскалааҺын, ититиитэ, уу киирэрэ, атын да үлэлэрэ. Устукатуурката бүтэн, истиэнэни тэҥнии сылдьаллар. Тас өттүгэр эпсиэйдээҺин бара турар. Билигин уонтан тахса үлэҺит бу дьиэҕэ үлэлиир – диэн кылгастык прорабтара Владимир Семенов сырдатта.
Дьиэ тутааччылар көмүс илиилэринэн өрөспүүбүлүкэ куораттара уонна сэлиэнньэлэрэ күннэтэ киэркэйэн-тупсан, олорорго тупсаҕай буолан иҺэллэр. ЭҺиги үлэҕит түмүгүнэн уонна уҺун тымныы кыҺыннаах, тыйыс айылҕалаах УҺук Хотугу дойдуга олорор сүүҺүнэн тыҺыынча киҺи олоҕун-дьаҺаҕын саҥа таҺымҥа таҺаарарга киллэрэр кылааккытынан киэн туттар бырааптааххыт. Бары бырайыактаргытыгар ситиҺиини, тус бэйэҕитигэр уонна дьиэ кэргэттэргитигэр чэгиэн доруобуйаны, дьолу-соругун баҕарабыт!
Татьяна Владимирова